Трент Шнајдер, 57, од предградието на Чикаго, Винтроп Харбор, е обвинет по федерални обвиненија за наводна закана дека ќе го убие американскиот претседател Доналд Трамп преку социјалните мрежи, соопшти Канцеларијата на американскиот обвинител за Северниот округ на Илиноис.
Според судските документи, Шнајдер објавил видео во „селфи“ стил на Инстаграм на 16 октомври во кое наводно му се заканувал на Трамп, објави ABC.
„Одам да купам оружје. Знам каде можам да најдам многу оружје и ќе се погрижам сам за тоа… Треба да те погубат, Трамп“, рекол тој во видеото.
Според тужбата, видеото било објавено околу 18 пати помеѓу 16 и 21 октомври, а натписот што го придружувал гласел: „Ова не е закана!!! Откако ќе изгуби сè… Доналд Трамп треба да биде погубен“, се вели во натписот.
Инцидентот го пријавил жител на Флорида кој го видел видеото на 16 октомври.
Шнајдер бил задржан во федерален притвор по апсењето во понеделник наутро и треба да се појави на суд во четврток на сослушување за притвор. Доколку биде осуден, се соочува со максимална казна од пет години затвор.
