Маск: САД би можеле да ја загубат демократијата и да станат еднопартиска држава

Американскиот милијардер Елон Маск изјави дека Соединетите Американски Држави би можеле да станат еднопартиска држава и да ја изгубат демократијата затоа што, како што изјави, „радикалните левичарски политичари ја толерираат нелегалната имиграција“.

„Радикалната левица долго време ги користи владините програми за да донесе и задржи голем број нелегални (а во некои случаи и легални) имигранти во земјата со цел да победи на изборите и да ја претвори Америка во еднопартиска држава, уништувајќи ја вистинската демократија. Колку повеќе го гледате ова, толку повеќе се ужаснувате од тоа на што се трошат вашите даночни пари и како, ако овој процес не се запре, вашиот глас нема да биде важен“, напиша извршниот директор на компанијата „Тесла“ на платформата „X“.

Маск додаде дека верува оти истата ситуација „се развива во Европа, Велика Британија, Канада, Австралија и Нов Зеланд“.

„Најочигледен пример е сомалискиот гласачки блок во Минесота, држава која историски немала Сомалијци, избирајќи го Илхан Омар во Конгресот на САД. Истото се случува и во Европа, Велика Британија, Канада, Австралија и Нов Зеланд.

Претседателот на САД, Доналд Трамп, постојано изјавуваше дека приближно 25 милиони луѓе влегле нелегално во земјата пред да ја преземе функцијата и се залагаше за построги имиграциски политики.

По неговата инаугурација, американскиот лидер потпиша извршна наредба со која се прогласува вонредна состојба на границата меѓу САД и Мексико.

Трамп изјави дека има намера да ја спроведе најголемата операција за депортација на недокументирани имигранти во американската историја. Политичките противници на Трамп ја обвинуваат неговата администрација за претерано строги мерки против мигрантите.