Марко Пејчиновски се прекрсти, па оствари херојски подвиг!

Охриѓанецот Марко Пејчиновски (19 години) го реализираше големиот подвиг кој го најави – го комплетираше модифицираниот триатлонот Ironman, долг 107 километри, предизвик во кој трчаше речиси осум часа, два и пол часа возеше велосипед и над девет и пол часа пливаше во Охридското Езеро. Сето ова го постигна и покрај ретката болест на левиот колк, пертес, од која боледува веќе девет години, а поради која му е отежнато одењето.

Сепак, Марко не дозволи тоа да му биде пречка во животот и кариерата, исто како и во минатото, па одлучи храбро да му се спротивстави на овој исклучително тежок предизвик. Инаку, тој и како тинејџер го препливуваше Охридското Езеро, за кое пишувавме многупати досега.

Во текот на триатлонот, неговиот тим предводен од татко му и брат му, го снимаа големиот дострел на младиот Пејчиноски, објавувајќи видеа на „Инстаграм“ и споделуваа детали од неговата рута да целта.

Првиот дел од триатлонот беше трчањето, кое Марко го почна околу полноќ во Свети Наум, а траеше речиси 7 часа и 47 минути, кога пристигна на целта во Струга. По ова, продолжи возењето велосипед, а зацртаната маршрута ја комплетираше за 2 часа и 33 минути, за да заврши со препливување на Охридското Езеро, од Свети Наум до Охрид, подвиг за кој му требаа речиси 9 часа.

Инаку, пред почетокот на овој голем подвиг, Марко се прекрсти пред иконите на Богородица, која му даде сила да го издржи напорното темпо на овој голем верски празник.