Ликот на Трамп ќе се појави на американската монета од еден долар/ФОТО

Ковачницата на пари на САД ќе почне да произведува монети од еден долар со ликот на претседателот на САД Доналд Трамп на предната страна, како дел од 250-годишнината од Соединетите Американски Држави, објави министерот за финансии Скот Бесант.

Новиот дизајн ги содржи зборовите „Слобода“, „Во Бога веруваме“ и „1776–2026“ на предната страна, додека на задната страна го има белоглавиот орел од претседателскиот печат.

Ова е ревидиран дизајн од нацрт објавен во октомври. На задната страна од тој претходен предлог беше прикажан Трамп со крената тупаница и зборовите „борба, борба, борба“, што се однесува на обидот за атентат врз него во 2024 година.

Трамп рече дека му е чест што е на монетата.

„Ми дадоа монета. Разбирам дека е многу необично“, рече Трамп во интервју за „Фокс Бизнис“.

Критичарите ја доведоа во прашање легалноста на таков дизајн. Американски закон од 1866 година наведува дека портрет на живо лице не може да се постави на американската валута, но таа одредба се однесува на хартиените пари издадени од Бирото за гравирање и печатење. Монетите ги ковува Ковачницата на пари на САД.

Конгресот донесе закон во 2020 година со кој му се дозволи на секретарот за финансии да издава комеморативни монети од еден долар за да ја одбележи 250-годишнината од Соединетите Американски Држави, но законот конкретно забрануваше дизајнот да прикажува живо лице.

Во интервју за „Фокс њуз“, емитувано во вторник, Бесант истакна дека на 150-годишнината од Соединетите Американски Држави се појавил тогашниот претседател Калвин Кулиџ.

„Значи, можеме да ставиме живо лице на монета“, рече Бесант, пренесува „Хина“.

 

View this post on Instagram

 

A post shared by The Washington Post (@washingtonpost)