Лавров: Западните обвинувања за руска вмешаност во инцидентот со дронот во Лајпциг се почеток на вистинска војна

Обвинувањата на западните земји за вмешаноста на Москва во инцидентот со дронот во Лајпциг се, во принцип, почеток на вистинска војна, изјави денес рускиот министер за надворешни работи Сергеј Лавров.

„Лајпциг, аеродромот, пронајдоа некаков дрон. Рекоа дека е руски дрон, но никој не се потруди да истражи. Ова е, во принцип, почеток на вистинска војна. Го протераа Генералниот конзулат од Бон и објавија дека го прекршиле договорот. Ја затвораат Руската куќа во Берлин. Се сеќавам дека пред почетокот на Втората светска војна, Големата патриотска војна, Германците ги затворија и своите дипломатски мисии“, рече Лавров, како што објави агенцијата „РИА Новости“.

Тој рече дека руските лидери ќе извлечат соодветни заклучоци од изјавите на германскиот канцелар Фридрих Мерц во врска со плановите за зајакнување на германската армија.

„Сите тие изјави што ги даде Мерц за тоа дека Германија повторно ќе стане водечка воена сила во Европа се спроведуваат во пракса. Тој во суштина ни објавува војна. А лекциите од историјата воопшто не се научени“, оцени Лавров.

Според него, „метастазите на нацизмот почнуваат да излегуваат на површина“.