Германскиот автомобилски гигант „Фолксваген“ планира големо намалување на бројот на вработени, со што вкупно околу 100.000 работни места ќе бидат укинати во рамки на преструктуирањето на групацијата. Новоусвоениот план предвидува кратење на уште околу 50.000 позиции ширум светот, покрај приближно 50.000 работни места чие укинување веќе е во тек.
Надзорниот одбор на компанијата го одобри сеопфатниот „План за иднината 2030“, кој раководството го смета за клучен за подобрување на конкурентноста на најголемиот европски производител на автомобили. Планот претставува најголемо преструктуирање во 89-годишната историја на „Фолксваген“.
Компанијата е под силен притисок поради растечката конкуренција од кинеските производители, послабата побарувачка на кинескиот пазар, високите трошоци и американските увозни царини. Во европските фабрики на групацијата во моментов има вишок производствен капацитет од повеќе од 500.000 автомобили годишно.
Посебно неизвесна е иднината на фабриките во Емден, Цвикау, Хановер и Некарсулм. „Фолксваген“ засега не може да гарантира нови производствени програми за овие погони во периодот од 2031 до 2034 година, а во следниот период ќе се разгледуваат можности за нивна алтернативна намена.
Планот предвидува и значително намалување на понудата на автомобили. До 2035 година групацијата сака да го преполови бројот на модели и за околу 75 проценти да ја намали комплексноста на производството. Целта е поголемо производство на помал број модели и намалување на фиксните трошоци.
„Фолксваген“ планира и поедноставна управувачка структура, побрзо носење одлуки и намалување на бројот на компании и удели во рамки на групацијата за приближно една третина. До 2030 година компанијата цели кон продажба од девет милиони возила годишно и оперативна маржа од девет проценти.
Групацијата има околу 650.000 вработени ширум светот и покрај основната марка „Фолксваген“ ги опфаќа и „Ауди“, „Шкода“, „Порше“, „СЕАТ“ и други автомобилски брендови.
