КРИЗА НА БЛИСКИОТ ИСТОК: Бесент најавува „најголема финансиска офанзива во историјата“

Американскиот претседател Доналд Трамп дополнително ги засили тензиите на Блискиот Исток откако на социјалните мрежи го прогласи Ормускиот теснец за нова територија на САД. Неговата објава дојде само еден ден откако тој тврдеше дека САД имаат „целосна контрола“ врз областа околу стратешки важниот теснец.

Во исто време, израелскиот премиер Бенјамин Нетанјаху ѝ нареди на војската да преземе сите мерки против, како што рече, смртоносна закана од беспилотни летала од Појасот Газа.

Израелските напади врз Газа продолжуваат на терен, при што загинаа најмалку две лица, вклучувајќи едно четиригодишно момче. Тензиите се зголемуваат и меѓу Израел и Сирија по израелскиот напад врз сириска воена база, додека шефот на Мосад, Роман Хофман, се сретна со сирискиот министер за надворешни работи, Асад ал-Шаибани, во обид да ја смири ситуацијата.

Американскиот министер за финансии Скот Бесант денес изјави дека американскиот претседател Доналд Трамп „ги демонтирал воените капацитети на Иран, уништил речиси 100 проценти од неговите воени фабрики и ја закопал неговата нуклеарна програма“.

Тој најави дека се очекува американската администрација да започне невидена „финансиска офанзива“ против Иран во зори на 24 август.

„Сега влегуваме во завршница. Во зори започнува економскиот Ден-Д – најголемата финансиска офанзива некогаш покрената против противник. Исламската Република преживеа со тоа што ја претстави изнудата како гаранција за безбедност. Таа црпи сила од пресметка која иранската одмазда ја смета за сигурна, а американското спроведување на законот за предмет на преговори. Под претседателот Трамп, таа ера е завршена“, наведе Бесант во објава на платформата X.

Багеи: Ќе ги искористиме сите свои капацитети за да се спротивставиме на американските санкции

Портпаролот на иранското Министерство за надворешни работи вели дека неговата земја ќе ги искористи сите свои билатерални капацитети за да се спротивстави на американските економски санкции, додавајќи дека Вашингтон продолжува да ја наметнува оваа неуспешна политика врз Техеран.

„Упорноста на Вашингтон во неуспешните методи нема друг резултат освен докажување на омразата на Америка кон иранскиот народ, бидејќи тие многу добро знаат дека директните последици од овие санкции се врз обичните граѓани“, рече Есмаил Багеи.

Дипломатот нагласи дека санкциите и заплашувањето од други земји за ограничување на трговските односи ги кршат темелите на слободната трговија и принципот на почитување на националниот суверенитет.

„Оваа нелегална практика е повик за будење за меѓународната заедница, бидејќи американските ексцеси и кршења на законот во меѓународните односи дури предизвикаа протести од нејзините блиски сојузници“, заклучи Багеи.