Кремљ реагираше на изјавата на Зеленски за средба со Путин во Констатиновка: Москва е отворена за разговори, но со јасна порака

Кремљ одговори на изјавата на украинскиот претседател Володимир Зеленски за можна средба со Владимир Путин, со порака дека Москва е подготвена за разговори.

Кремљ реагираше на изјавата на украинскиот претседател Володимир Зеленски, кој изјави дека е подготвен за средба со рускиот претседател Владимир Путин во Константиновка, град за кој некои украински извори тврдат дека не е целосно под руска контрола.

Портпаролот на Кремљ, Дмитриј Песков, изјави дека Москва е отворена за разговори, но дека, како што истакна, „Путин претходно изразил подготвеност да го прими Зеленски во Москва“.

– Доколку г-дин Зеленски на тој начин ја изрази својата подготвеност да дојде во Руската Федерација, ние тоа го поздравуваме. Но, ве потсетуваме дека претседателот Путин зборуваше за својата подготвеност да го прими во Москва. Москва, а не Константиновка, е главен град на Руската Федерација. Тој може да дојде во Москва кога ќе биде подготвен да донесе важни и одговорни одлуки – изјави Песков за весникот „Комсомолскаја правда“.

Тој, исто така, во таа прилика изјави дека, според руските тврдења, Константиновка е „целосно под контрола на руските вооружени сили“.