Британските здравствени власти ќе ги наградуваат луѓето што пешачат 30 минути дневно

Редовното пешаче долго време се поврзува со подобро здравје, а за прв пат, Националната здравствена служба (NHS) на Велика Британија ќе ги награди луѓето за физичка активност.

На почетокот на следната година, Националната здравствена служба  ќе го лансира предизвикот „Маратон месечно“, во кој луѓето ќе одат околу 30 минути секој ден, објавува „Би-би-си“.

Оние кои ќе ја исполнат дневната цел ќе одат околу 42 километри месечно – еквивалент на маратон.

Корисниците ќе можат да ги евидентираат своите прошетки онлајн, преку нивниот мобилен телефон или паметен часовник.

Националната здравствена служба вели дека оние кои успешно ќе го завршат предизвикот ќе имаат право на награди, кои би можеле да вклучуваат бенефиции и попусти.

Сепак, кога станува збор за стимулации, таа не мисли дека попустите се доволни.

„Ако мојата прошетка се претвори во бесплатна награда, како пијалак или храна, тоа би ме мотивирало уште повеќе.“

Лицата под 25 години со кои разговараше „Би-би-си“ генерално беа позитивни во врска со иницијативата. Еден испитаница рече дека предизвикот сличен на игра ќе ѝ помогне да биде поактивна. Таа додаде дека тоа е силен мотив за неа и нејзините пријатели да не прекинат низа од последователни денови во кои ја исполниле својата цел.

Друг испитаник, кој веќе пешачи околу маратонска дистанца секој месец, призна дека со задоволство би прифатил бесплатна награда за нешто што веќе го прави.

Првичните трошоци на програмата ќе бидат покриени од Националната здравствена служба, но планот е да се обезбеди поддршка од големи компании и филантропски организации како што се шири иницијативата.

Програмата се развива во соработка со Сер Брендан Фостер, поранешен освојувач на олимписки медал и основач на Great North Run, кој беше задолжен од NHS England да дизајнира кампања за да ги охрабри луѓето да пешачат повеќе.

„Познат сум по трчање, но целта на овој проект е многу поедноставна. Само сакаме луѓето да одат. Толку е едноставно“, рече Фостер.

Иницијативата е дел од 10-годишен здравствен план за Англија. Фостер вели дека неговата мисија е да направи повеќе луѓе физички активни.

Според Здравствената служба, физичката неактивност е поврзана со еден од шест смртни случаи. Едно лице се смета за физички неактивно ако прави помалку од 30 минути физичка активност со умерен интензитет неделно.

Истражувањето на „Спорт Англија“ покажа дека до ноември 2025 година, речиси една четвртина од возрасните, или околу 12 милиони луѓе, ќе бидат во оваа категорија.

Целта е да се привлечат повеќе од 100.000 учесници, чии дневни резултати ќе бидат дигитално евидентирани.

Доколку се постигне оваа цел, Фостер вели дека тоа би бил најголемиот маратон во историјата.

Тој се надева дека таканаречената „култура на низи“ позната на корисниците на апликации како Snapchat и Duolingo ќе им помогне на луѓето да се држат до предизвикот.

Фостер вели дека здравствените придобивки, како и потенцијалните заштеди за Службата, би можеле да бидат значајни.

„Ако некој пешачи 30 минути пет пати неделно, би можел да добие до четири дополнителни години здрав живот“, рече тој.

Соња Помбо, директорка за истражување и влијание во Action on Salt & Sugar, верува дека редовното вежбање може да направи голема разлика во здравјето.

„Охрабрувањето на луѓето да вклучат редовно движење во нивниот секојдневен живот може да го подобри здравјето, а ако е едноставно, остварливо и наградувачко, повеќе луѓе веројатно ќе се вклучат“, вели таа.

Сепак, таа предупредува дека подобрувањето на јавното здравје не може да се базира само на промена на индивидуалното однесување.

„Ако владата е сериозна во врска со подобрувањето на здравјето на населението, особено на децата, ваквите иницијативи мора да бидат придружени со посилни превентивни мерки.“

Целосните детали за програмата за награди, вклучително и информации за ваучерите и како да се аплицира, ќе бидат објавени во наредните месеци.