Уште една германска пиварница со долга традиција трајно ги затвора своите врати.
Производството на пиво во пиварницата „Волтерс“ (Wolters) во Брауншвајг ќе продолжи само до крајот на годината, потврди портпарол на адвокатската канцеларија „Екерт“ (Eckert), која ја води постапката за несолвентност.
Околу 90 вработени беа известени за затворањето во понеделникот.
Пиварницата, основана во 1627 година, поднесе барање за несолвентност летово, наведувајќи го како една од причините падот на продажбата на германскиот пазар на пиво. Во меѓувреме, „Волтерс“ бараше и нов капитал.
„Потрагата по инвеститор за производствениот погон на крајот не вроди со плод“, соопштија од адвокатската канцеларија.
Минатата година, германскиот пазар на пиво го забележа најголемиот пад од обединувањето на земјата, објави Сојузниот завод за статистика на почетокот на февруари.
Летово, компанијата изјави дека нејзината цел е темелно реструктуирање на работењето и ново економско позиционирање. Постапката за несолвентност започна на 1 септември.
Синдикатот NGG го критикуваше краткиот временски период меѓу почетокот на постапката за несолвентност и одлуката за затворање. Затворањето на пиварницата не мора да значи и крај на брендот.
„Напорите за зачувување на брендот ‘Волтерс’ продолжуваат“, соопштија од канцеларијата, додавајќи дека во тек се „конструктивни разговори со неколку заинтересирани страни“.
Во последните години и месеци, неколку пиварници во Германија се затворија поради слаба продажба. Неодамна беше затворен погон во Херфорд, Северна Рајна-Вестфалија. Претходно оваа година, престана и производството во „Отингер“ (Oettinger) во Брауншвајг.
