Крај на пушењето на терасите, на удар се и вејповите: Драконски казни до 600.000 евра ако ги прекршите правилата во Шпанија

Шпанската влада одобри нацрт-закон со кој значително се заоструваат правилата за пушење и употреба на сродни производи. Реформата за прв пат регулира производи како што се електронски цигари и никотински кесички, додека пушењето ќе биде забрането на ресторанските тераси, плажите и спортските терени. Целта е законот од 2005 година да се усогласи со новите потрошувачки навики, објавува „Еуроњуз“.

Нацрт-законот сега оди во парламентарна процедура, каде што пратениците ќе можат да поднесат амандмани пред конечното усвојување. Тој е дел од Сеопфатниот план за спречување и контрола на пушењето за периодот од 2024 до 2027 година и најголемата реформа на законите за тутун во последните десет години. Министерството за здравство вели дека сакаат да го зголемат бројот на зони без чад, да ги заштитат децата и адолесцентите, но и законски да ги регулираат новите никотински производи за кои досега немаше јасни правила.

Се проширува списокот на места каде што ќе биде забрането пушењето
Најголемата вест се однесува на проширувањето на списокот на локации каде што ќе биде забрането пушењето. Доколку се усвои законот, цигарите, електронските цигари и другите сродни производи нема да бидат дозволени да се користат на тераси на кафулиња и ресторани, морски и речни плажи, јавни базени, спортски терени и во национални паркови.

Забраната ќе важи и за службени возила, освен ако не се користат исклучиво за приватни цели, како и на отворени простори каде што се одржуваат јавни настани. Заштитни зони со дијаметар од 15 метри ќе бидат воведени и околу влезовите во јавните институции, болниците, училиштата, универзитетите, библиотеките, музеите и детските игралишта.

– Секој што сака да пие кафе или да помине време на тераса треба да може да го прави тоа без пасивно пушење од соседните маси – изјави министерката за здравство Моника Гарсија, додавајќи дека пушењето во Шпанија одзема околу 50.000 животи годишно.

Целосна забрана за малолетници
Новиот закон за прв пат воведува експлицитна забрана за консумирање тутунски производи за лица под 18 години. Досега, беше забранета само продажбата на малолетници, додека самата потрошувачка не беше казнива.

Според истражувањето „Естудес 2025“, 4,3 проценти од младите на возраст од 14 до 18 години пушат секојдневно, што е најнизок процент од 1994 година. Сепак, дури 15,5 проценти од испитаниците од истата возрасна група изјавиле дека користеле тутунски производи во претходниот месец.

Нацртот ја задржува забраната за употреба на никотински кесички од страна на малолетници, но овие производи нема да бидат вклучени во проширувањето на сите зони без чад.

Електронските цигари се изедначени со тутунот
Реформата ги изедначува електронските цигари и сличните производи со класичните цигари. Ова значи дека забраната ќе се однесува и на уреди што содржат никотин и на уреди без никотин, производи за пушење од билки, наргиле и сите уреди што имитираат пушење.

Нивната продажба ќе биде дозволена исклучиво во специјализирани продавници, чии услови за работа ќе ги пропише Министерството за здравство. На ваквите објекти нема да им биде дозволено да имаат реклами видливи од улицата.

Владата засега ја напушти забраната за вејпови за еднократна употреба и воведувањето на обично пакување цигари, но најави дека ќе се обиде повторно да ги воведе овие мерки за време на парламентарната дебата, по усогласувањето со регулативите на Европската Унија.

Построги правила за рекламирање
Предлог-законот дополнително ги заострува правилата за рекламирање, промоција и спонзорство на тутун и сродни производи. Ограничувањата ќе важат за сите медиуми и платформи, вклучувајќи го интернетот, автоматите за продажба и сите форми на директно или индиректно рекламирање.

На телевизија и други аудиовизуелни медиуми, на презентерите, гостите и соработниците нема да им биде дозволено да се појавуваат додека пушат или прикажуваат цигари, електронски цигари или други производи што содржат никотин. Исто така, ќе биде забрането прикажување на брендови, логоа и други комерцијални знаци.

Казни до 600.000 евра
Новиот закон предвидува и построг систем на казни. Според локалните медиуми, казните ќе се движат од 200 до 600.000 евра, во зависност од сериозноста на прекршокот.

Малолетниците кои ќе ја прекршат забраната за консумирање тутунски производи ќе бидат казнети со најмалку 200 евра за помали прекршоци, но казната може да се замени со општествено корисна работа.

Доколку се усвои, законот ќе стапи на сила 20 дена по објавувањето во службен весник, додека угостителските објекти и другите институции ќе имаат рок од два месеци да постават знаци што ги означуваат новите зони за пушење.