Ќе се постават 146 надзорни камери на 54 локации

На територијата на Општина Штип ќе бидат поставени 146 надзорни  камери на 54 различни локации. Поставувањето на камерите доби зелено светло од советниците во Советот на Општина Штип.

Оваа мерка е дел од поголемиот проект наречен „Безбеден град“, кој има цел да ја зголеми безбедноста на граѓаните и да се намали криминалот во различни делови на градот.

– Камерите ќе бидат поставени на стратешки избрани локации како училишта, детски градинки, паркови, пешачки зони, јавни игралишта и клучни сообраќајници. Во согласност со проектот, најголем дел од камерите ќе бидат поставени на места со висок ризик од дејствување на неовластени лица, што ќе овозможи поголема контрола и превенција на потенцијални криминални активности. Во оваа иницијатива, централната база за видеонадзор ќе биде лоцирана во просториите на Општина Штип, додека податоците ќе се споделуваат и со СВР Штип за да се осигури дека полицијата има постојан и лесен пристап до снимките за потребите на истражните процеси – велат од Општина Штип.

Проектот предвидува поставување различни типови камери, со оглед на нивната спецификација и намената. Според податоците објавени од Општината, 136 камери ќе бидат со една техничка спецификација, која ќе овозможи висококвалитетен и јасен видеонадзор, додека другите 10 камери ќе бидат со посебни технички карактеристики, кои ќе ги задоволат потребите на најкритичните локации, како што се главните влезови во градот и важните институции.

Според секретарката на Општина Штип, Вишна Шорова- Ангелова, поставувањето камери ќе има двојна цел: обезбедување на јавните површини и објекти и заштита на граѓаните од потенцијални закани.

– Целта на оваа иницијатива е да ги заштитиме сите овие важни површини и објекти, но, исто така, и да го зголемиме нивото на безбедност за нашите граѓани. Камерите ќе бидат важен алат за навремена реакција на безбедносните служби и за превенција на кривични дела – изјави Шорова-Ангелова.