Ќе се гради нова патека за Мото ГП-трките

Австралиското гран при во Мото ГП од 2027 година ќе добие нова локација откако Аделаида ќе ја замени „Филип Ајленд“. Новата улична патека ќе биде изградена на просторот каде што се возеше Формула 1 до 1995 година. Патеката ќе биде долга 4,13 километри и ќе има 15 кривини. Според симулациите, моторите од Мото ГП на најдолгите делници ќе достигнуваат брзина од дури 343 км/ч. Очекуваното време за еден круг ќе биде околу 1:26 минути. Проектот ќе чини околу 96 милиони австралиски долари, а завршувањето е планирано до ноември 2027 година. Сепак, изградбата предизвика и еколошки контроверзии. Планирано е отстранување на 42 значајни дрвја, како и на уште 335 други дрвја. Од вкупната инвестиција, 15 милиони долари ќе бидат издвоени за обновување на зелените површини и на живеалиштата.

Така, Австралија се подготвува за нова спектакуларна Мото ГП-ера во Аделаида.