Кан, Ахмед и Али најчести презимиња во Британија, традиционалните Џонс, Вилијамс, Тејлор ги има сè помалку

Традиционалните британски презимиња постепено го губат своето место меѓу најчестите презимиња на новороденчиња во Англија и Велс, според податоците на  „Дејли мејл“.

Во 1996 година, најчестите презимиња кај бебињата родени во Англија и Велс беа Смит, Џонс и Вилијамс. Првите десет ги комплетираа Тејлор, Браун, Дејвис, Еванс, Томас, Џонсон и Вилсон. Три децении подоцна, листата на десетте најчести презимиња изгледа поинаку: Смит, Кан, Ахмед, Али, Џонс, Хусеин, Синг, Вилијамс, Пател и Каур. Иако сè уште е во првите десет, презимето Џонс изгуби 43 проценти од својата популарност. Вилијамс, кој сега е на осмото место, забележа сличен пад. Другите презимиња вообичаени во 1990-тите сега заземаат позиции од 11. до 17. место.

Според британската канцеларија за национална статистика, популарноста на презимињата Кан, Ахмед и Али се зголемила двојно. Презимињата Синг и Каур, кои традиционално ги користат мажите и жените од сикиската вероисповед, бележат најмалку петкратен пораст. Роб Бејтс од Центарот за контрола на миграцијата изјави за „Дејли мејл“ дека податоците покажуваат „брза демографска промена“ во Велика Британија.

– Постои ризик нашата земја целосно да го изгуби контактот со своето наследство и нашето општество станува сè пофрагментирано како резултат на тоа, рече тој.

Податоците вклучуваат раѓања регистрирани во Англија и Велс, а ги исклучуваат презимињата што се евидентирани двапати или помалку. Анализата, финансирана од „Дејли мејл“, се базира на правилното пишување на презимињата, така што различните варијанти на истото презиме се водат одделно. Податоците, исто така, покажуваат дека има сè повеќе различни презимиња кај новороденчињата. Во 2025 година, евидентирани се повеќе од 23.400 презимиња, во споредба со 21.600 претходната година. Само 23 презимиња им биле дадени на најмалку 1.000 бебиња минатата година, во споредба со 57 пред три децении. Презимето Смит, кое сè уште е најчесто кај новороденчињата, е регистрирано кај 4.102 бебиња, во споредба со 7.276 во 1996 година.

Податоците доаѓаат откако летоска беше објавено дека името Мухамед е најпопуларното име за момчиња родени во Англија и Велс трета година по ред. Според Канцеларијата за национална статистика, во 2025 година, името, во тој конкретен правопис, им било дадено на 5.957 момчиња. Оливија беше најпопуларното име за девојчиња четврта година по ред, додека Лили се искачи на второто место. Амелија, која беше второ најпопуларно име за девојчиња во 2024 година, падна на третото место. Меѓу момчињата, Ноа го освои второто место, а потоа Лео.