Како да станете дел од револуцијата? На оваа плажа не ви треба кеш или картичка, „Биткоин бич“ единствен екперимент во светот

На пацифичкиот брег на Ел Салвадор, скриено меѓу палми и бранови, има мало место наречено Ел Зонте – денес познато како Биткоин Бич. Некогаш скромно рибарско село и рај за сурфери, денес е глобален симбол на уникатен економски експеримент. Од 2019 година, локалната заедница го користи Биткоинот како секојдневно средство за плаќање, покажувајќи му на светот како криптовалутите можат да ги променат животите на обичните луѓе.

За оние што за прв пат доаѓаат во Ел Зонте, може да изгледа како да отишле на некоја далечена плажа. Но, зад лежерниот изглед лежи приказна за финансиска иновација што ги изненади дури и најстрасните скептици.

Биткоин како готовина: Плаќање без граници

Многу патници и туристи кои доаѓаат на Биткоин Бич се изненадени кога сфаќаат дека можат да платат за речиси сè со Биткоин – од ладно пиво на плажа, до вечера во локален ресторан, па сè до хотелска соба. Самата идеја дека дигитална монета би можела да ги замени парите на такво место изгледа како научна фантастика, но тука тоа е секојдневие.

Во еден скромен бар, новинарот лично испроба како изгледа плаќањето со биткоин. Без никакво двоумење, шанкерот го извади својот уред, го покажа QR-кодот и телефонот „трепна“ – и за неколку секунди, трансакцијата беше завршена. Без пари, без картички, само дигитален код што ја отвори вратата кон нов економски свет.

Од локална иницијатива до државна политика

Сè започна во 2019 година, кога економистот Мајк Петерсон и лидерот на заедницата Роман Мартинез добија анонимна донација во биткоин. Нивната идеја беше едноставна – да вработат млади луѓе да чистат плажи и реки и да им платат во криптовалути за нивните напори. Бидејќи пандемијата ги затвори традиционалните извори на приход, овој проект брзо се прошири во целата заедница и стана нивна надеж, пренесува Курир.рс.

Посебна карактеристика на Ел Салвадор е тоа што од 2001 година го користи американскиот долар, а не својата национална валута. Ова му овозможи на Биткоинот да не се натпреварува со локалните пари, туку да заземе посебно место во локалната економија – особено затоа што голем дел од населението никогаш немало пристап до банки.

Младите луѓе како носители на промените

Еден од најинтересните херои во оваа приказна е Брајан Флорес, 23-годишник кој започнал како еден од првите вработени во проектот, а сега ги учи другите како да користат биткоин. „Биткоин Бич ми го промени животот“, вели Брајан. „Сите мои пријатели од училиште се или мртви или во затвор. Работевме на фарми и едвај преживувавме. Кога се појави биткоинот, сè се промени.“

Брајан сега е глобален амбасадор на проектот – тој патува низ целиот свет, од Аргентина до Шпанија, држејќи предавања и ширејќи ја приказната за тоа како криптовалутите можат да бидат можност за младите луѓе во сиромашните заедници.

Како можете да станете дел од револуцијата

За туристите кои сакаат да ја искусат оваа единствена економија, користењето на Биткоин е лесно и брзо. Сè што треба да направите е да ја преземете апликацијата за крипто паричник, да додадете биткоин и сте подготвени да платите кај кој било продавач или сервис што ја поддржува оваа технологија.

Во меѓувреме, целиот проект „Ел Зонте“ послужи како инспирација за претседателот Наџиб Букеле, кој во 2021 година донесе одлука биткоинот да стане официјално средство за плаќање низ целата земја. Така, Ел Салвадор стана првата земја во светот што целосно ја прифати криптовалутата како дел од секојдневниот живот.