Иранската влада вети дека ќе им се спротивстави на американските санкции

Иранската влада денеска објави дека ќе им се спротивстави на американските санкции, опишувајќи ги како американско-израелска „заговор“.

Во соопштение пренесено од државните медиуми, иранската влада вети дека ќе примени и дипломатски и одбранбени мерки за заштита на интересите, безбедноста и територијалниот интегритет на земјата.

Таа најави планови за ограничување на инфлацијата, зголемување на вработеноста, поддршка на домашното производство и постепено намалување на зависноста од доларот, објави британската новинска агенција Ројтерс.

Шест месеци откако САД и Израел започнаа војна против Иран, преговорите се во застој, а администрацијата на претседателот Доналд Трамп ги засили напорите за финансиско казнување на Иран.

Вашингтон ги предупреди земјите ширум светот да ги прекинат деловните врски со Иран или да се соочат со секундарни санкции.

Сепак, Министерството за финансии на САД не воведе казни за главните трговски партнери на Иран – Кина и Индија – потег што би можел да има последици и за американската и за глобалната економија.

Врховниот лидер ајатолах Моџтаба Хамнеи – кој не е виден во јавноста откако беше повреден во првичниот напад на 28 февруари, во кој загинаа неговиот татко и поранешен врховен лидер, ајатолах Али Хамнеи – ја повика владата да се справи со економските проблеми на Иран.

„Потребно е сериозно да се решат низа економски предизвици и прашања поврзани со животниот стандард, како што се инфлацијата, невработеноста, управувањето со цените и пазарот на стоки и услуги“, се наведува во соопштението припишано на Хамнеи. Иранскиот претседател Масуд Пезешкијан изјави за државните медиуми дека надворешната трговија на Иран опаднала за 35 отсто поради американските санкции и американската блокада на иранските пристаништа.

Сепак, Пезешкијан изјави дека Иран успеал да продаде приближно 90 милиони барели нафта додека бил во сила краткотрајниот меморандум за разбирање – потпишан од САД и Иран во јуни, кога Вашингтон го дозволи извозот на иранска нафта.