Информативните табли на Шaр Планина искршени, исчкртани, бутнати на земја

Новопоставените информативни табли во Националниот парк „Шар Планина“ се цел на вандализам. Некои се искршени, исчкртани, бутнати на земја. За ова со голема тага и разочараност информираа од НП „Шар Планина“.

Оттаму велат дека овој чин е пријавен во полиција и надлежните органи веќе работат на пронаоѓање на сторителите.

– Додека ние со љубов и посветеност го чистиме отпадот и работиме на унапредување на искуството за сите посетители, некои избираат да рушат и уништуваат. Овие вандалски дејства не се само непочитување на трудот на сите што се грижат за Шара туку и директен напад врз државна институција и заштитено природно богатство. На сторителите нека им служи на чест – потенцираат од НП „Шар Планина“.

Тие ги повикаа сите оние што вистински ја сакаат Шар Планина, да придонесат кон нејзината заштита.

– Чувајте ги информативните табли, тие се таму за сите нас. Поддржете ја одржливоста на паркот со плаќање на надоместокот за влез со моторно возило, едноставно, со испраќање СМС-порака. Да ја чуваме Шара, за нас и за генерациите што доаѓаат! – порачаа од НП „Шар Планина“.

Од Управата на овој национален парк повторија дека жителите на селата во рамките на паркот, сопствениците на приватни имоти, како и правните лица регистрирани на територијата на паркот се ослободени од надоместокот за движење во своите зони.