Возачите на Мекларен, Ландо Норис и Пјер Гасли, имаа уште еден феноменален викенд во Формула, но нивното шоу им го украде германскиот возач Нико Хулкенберг. Тој го прослави првиот подиум во кариерата и верувале или не, тој доаѓа по 239 трки!
Ветеранот, кој вози за тимот на Заубер, конечно заврши трка меѓу првите тројца на една трка, на славната патека „Силверстон“ за Големата награда на Велика Британија. Ова трето место е уште позначајно бидејќи трката ја стартуваше од претпоследното место. Тој стигна на целта зад дуото на Мекларен, Ландо Норис и Оскар Пјастри, оставајќи ги зад себе Луис Хамилтон, Макс Верстапен, Пјер Гасли, Ленс Строл…
- Помина долго време, нели? Знаев дека можеме да го направиме ова, го имав тоа некаде во мене. Каква трка, стартував речиси последен, сето тоа е малку нереално. Не сум сигурен што се случуваше и како, но условите беа луди, дожд, потоа сонце. Целата трка беше борба само за останување на патеката, борба за преживување. Мислам дека ги донесовме вистинските одлуки во вистинско време, ги сменивме гумите во вистинскиот момент, не направивме никакви грешки. И да, сè беше одлично, истакна Хулкенберг по трката.
He started P19 and finished P3! 💪
A remarkable race and an incredible journey for @HulkHulkenberg 🤩#F1 #BritishGP pic.twitter.com/1djJWJJyGy
— Formula 1 (@F1) July 6, 2025
За својот прв подиум по 239 трки, тој рече: – Денес не верував во овој резултат сè до последното запирање во боксот, потоа видов дека бегам од Хамилтон на еден круг до крајот и си реков: „Ок, ова е добро“. Можев да дишам, но исто така знаев дека Луис може да ја казни секоја моја мала грешка. Притискаше, трката беше многу напната. Не направивме никакви грешки и очигледно сме многу среќни за сè што прикажавме денес.
Британците не видоа двајца од своите сонародници на подиумот, благодарение на Хулкенберг.
- Знаев дека Хамилтон ќе даде сè од себе пред своите навивачи, но си реков: „Жал ми е, но ова е и мој ден“. Морав да ја извадам главата од кокпитот откако ја поминав целта. Пресреќен сум. Ви благодарам на сите овде за неверојатната енергија и поддршка секоја година, додаде Нико.
Колку долго е во Формула 1 најдобро покажува фактот дека на своето деби на патеката стоеше покрај Михаел Шумахер (тогаш во „Мерцедес“), потоа покрај Џенсон Батон, Марк Вебер, Роберт Кубица, Тимо Глок, Јарно Трули… но, и покрај Фернандо Алонсо и Луис Хамилтон, кои денес завршија во бодови на „Силверстон“.
