Сообраќајните камери со вештачка интелигенција во пошироката област на Атина регистрираа повеќе од 2.000 сериозни сообраќајни прекршоци за само четири дена, според резултатите од пилот-проектот на грчките власти.
Од вторник до петок, камера со вештачка интелигенција инсталирана на авенијата Сингро наводно регистрирала повеќе од 1.000 прекршоци, вклучително и користење мобилни телефони и неносење безбедносни појаси, објави „Катимерини“.
Во истиот период, околу 800 случаи на пребрзо возење се регистрирани на дел од патот каде што ограничувањето на брзината е 90 километри на час.
Евидентирани се и 480 прекршоци за поминување на црвено светло.
Пилот-програмата, започната минатата недела на осум локации со висок ризик по препорака на грчката полиција, е дел од поширока кампања за подобрување на безбедноста на патиштата.
„Ова е политичка одлука со јасна социјална цел. Станува збор за намалување на бројот на сообраќајни несреќи и спасување животи“, рече министерот за дигитално управување Димитрис Папастергиу.
Според него, целта на оваа акција е одвраќање, а не казнување.
„Сакаме граѓаните да знаат дека правилата важат за сите и се спроведуваат на фер и современ начин“, рече тој.
Камерите снимаат сериозни прекршувања на Сообраќајниот законик, вклучувајќи брзо возење, поминување на црвено светло, неносење појас, користење мобилни телефони при возење и нелегално користење на ленти за итни случаи.
Возачите ќе бидат известени за прекршоци преку дигитално поштенско сандаче на владината платформа gov.gr или преку електронски пораки, а ќе можат да поднесуваат жалби преку интернет.
Како што е најавено, властите планираат да ја прошират мрежата на 2.500 камери низ целата земја, вклучувајќи 2.000 фиксни единици на локации со висок ризик и 500 камери инсталирани во автобусите на јавниот превоз за следење на автобуските ленти.
