Грција ја плаши Иран: Распоредени ракети „Патриот“ по заканите за базите во Европа

Батеријата на проектилите „Патриот“ денеска се преместува од островот Карпатос, на крајниот исток од Грција, на Крит поради иранските закани кон американските бази во Европа, објавија грчките медиуми.

Трансферот започна во недела наутро, објавија неколку грчки медиуми, со фотографии на кои се гледаат ракетни системи поставени на камиони во пристаништето, пред товарењето.

Батеријата „Патриот“ ќе биде транспортирана на Крит, до воениот објект Суд, каде што се наоѓа најголемата воена база на САД и НАТО во Источниот Медитеран.

Според грчките медиуми, овој потег се случил по извештаите дека Иран размислува за напади врз американски воени цели во Европа доколку претседателот Доналд Трамп го ескалира конфликтот во Ормускиот теснец.

Грчкото Министерство за одбрана не коментираше за ова прашање.

Според статија на „Фајненшл тајмс“ (FT) објавена минатата недела, повикувајќи се на извори во иранскиот режим, Иран повеќе нема да го ограничува својот одговор на Блискиот Исток и размислува за напади врз американски цели во Европа во случај на нова ескалација на американската воена активност.

Според овие извори, иранските сили ја процениле можноста за напад врз американски објекти на Балканот и Медитеранот.

Бугарија, каде што воздухопловната база Безмер е одобрена да се користи за полнење гориво на американски авиони од јули до октомври 2026 година, и Кипар, каде што британска база веќе беше погодена од беспилотно летало во март, се меѓу нив.

Грчкиот весник „Катимерини“ пишува дека одлуката за распоредување на батеријата „Патриот“ на Крит била силно под влијание на проценката на можностите на иранскиот арсенал.

Според информациите што сојузниците ѝ ги дале на Атина, Иран сè уште има доволен број балистички ракети со дострел од повеќе од 2.000 километри со кои би можел да таргетира бази и инфраструктура во Југоисточна Европа.

Ракетите „Патриот“ беа префрлени на островот Карпатос во март.

Истиот месец, по нападот со беспилотни летала врз британската база Акротири на Кипар, Грција испрати борбени авиони Ф-16 и фрегата опремена со систем за неутрализација на беспилотни летала на островот.

Друга грчка батерија „Патриот“ е распоредена во Саудиска Арабија од септември 2021 година, каде што веќе е користена неколку пати против ирански ракети и беспилотни летала насочени кон таа земја.