Го варите наутро, а го пиете до пладне: Стоматолозите откриваат зошто треба што побрзо да се откажете од таа навика

Подготвувате шолја кафе, ги отворате пораките и одговарате на првата е-порака. Пиете голтка, но потоа ве прекинува телефонски повик. Следната голтка ја земате дури по десетина минути, а последната – кога кафето е веќе сосема ладно. До пладне сте испиле само една шолја, но сепак, вашите заби биле изложени на кафе постојано, во текот на целото утро.

Токму на овој детал укажуваат стоматолозите. Пиењето кафе за време на една пауза не е исто што и пиењето голтка по голтка во текот на неколку часа.

Што се случува по секоја голтка?

Кафето е благо кисело. Кога го пиете, забите доаѓаат во допир со овие киселини; плунката потоа помага да се неутрализираат и да се воспостави рамнотежа во усната шуплина.

Сепак, за овој процес е потребно време. Ако продолжите да земате нови голтки, го продолжувате времето во кое забите се изложени на киселини, оставајќи ѝ помалку време на плунката да ја одигра својата заштитна улога. Данте Девоти, стоматолог од Универзитетот Колумбија, објаснува дека долготрајната кисела средина го зголемува ризикот од ерозија – постепено губење на забната глеѓ.

Додавањето шеќер покренува уште еден процес

Ако ставите шеќер во кафето, бактериите во устата го користат како храна и создаваат дополнителни киселини. Како резултат на тоа, пиењето засладено кафе во текот на подолг период значи постојана изложеност на шеќер, што придонесува за ризикот од појава на кариес.

Саша Рос, пародонтолог од клиниката „Кливленд“ (Cleveland Clinic), предупредува дека ерозијата може да ги направи забите почувствителни и поподложни на оштетувања.

Како да ја промените оваа навика?

Практичен совет е да одвоите посебна пауза за кафето, наместо да го чувате покрај тастатурата и да земате голтка секојпат кога ќе погледнете кон шолјата.

Откако ќе го испиете кафето, можете да ја исплакнете устата со обична вода. Ако планирате да ги измиете забите потоа, Рос советува да почекате од 30 до 60 минути; миењето на забите веднаш по консумирањето кисел пијалак може дополнително да ја оштети забната глеѓ, која во тој момент е привремено омекната.