Германската полиција покрена истрага откако робот наводно сексуално вознемирил тинејџерка

Полицијата во Германија покрена истрага за сексуален напад откако робот, управуван од двајца тинејџери, наводно го триел својот долен дел од телото (карлицата) од 16-годишна девојка и ја допирал, пренесува Си-ен-ен“.

Според извештајот, инцидентот се случил доцна во неделата вечерта во градот Келн, во западната покраина Северна Рајна-Вестфалија.

Полицијата соопшти дека 16-годишниот сопственик на роботот и неговиот 19-годишен придружник го снимале наводниот напад и го емитувале во живо на социјалните мрежи.

Девојката се наоѓала пред ресторан за брза храна во периодот меѓу 23:45 часот и полноќ по локално време, во друштво на пријателки на возраст од 17 и 18 години. Роботот, висок околу 1,20 метри, ѝ пришол одзади и ги извршил наводните дејствија, соопшти полицијата, пренесува „Си-ен-ен“.

На местото на настанот биле испратени служби за итна интервенција, кои ги затекнале наводните сторители и го пронашле роботот во багажникот на автомобил, извести полицијата.

Надлежните органи ги одзеле роботот и мобилните телефони на двајцата осомничени.

На снимките што кружат на интернет се гледа како роботот – облечен во бел елек и со златно ланче и очила за сонце – им приоѓа на жени на улицата и прави експлицитни сексуални гестови, се наведува во извештајот. Надлежните истражуваат дали движењата на роботот биле однапред програмирани или некој намерно го управувал во моментот на инцидентот.