ЕУ ги олабавува правилата за да создаде посилни банки

Европската Унија подготвува една од најголемите реформи на банкарската регулатива во последните години, со цел да го намали регулаторното оптоварување, да ослободи капитал за инвестиции и да создаде посилни паневропски банки способни да им конкурираат на американските финансиски гиганти.

Според предлогот, Брисел размислува за укинување на дел од правилата познати како „Столб 2“, кои им овозможуваат на националните регулатори да бараат дополнителни капитални резерви од банките. Предвидено е и поедноставување на регулаторното известување, намалување на дел од капиталните барања и забрзување на воспоставувањето заеднички европски систем за осигурување на депозити.

Една од главните цели е да се поттикнат прекугранични спојувања на банките, со што би се создале поголеми финансиски институции кои ќе можат порамноправно да се натпреваруваат со американските конкуренти.

Реформите доаѓаат во време кога и САД и Обединетото Кралство размислуваат за олеснување на банкарските регулативи. Во САД, на пример, се предлага намалување на капиталните барања за најголемите банки за околу пет проценти.

Експертите оценуваат дека пониските капитални барања би можеле да ја зголемат профитабилноста на банките и да ги направат поатрактивни за инвеститорите, но предупредуваат дека само намалувањето на регулативата нема да биде доволно за значително зголемување на конкурентноста.

Според Ендру Стимсон од KBW, Европа конечно сфатила дека за финансирање на стратешките инвестиции во одбраната, вештачката интелигенција и енергетиката се потребни посилни банки со поголем кредитен капацитет.

Европскиот банкарски сектор со години се соочува со проблемот на фрагментираност, додека американските банки имаат предност благодарение на својата големина и доминацијата на пазарите на капитал. Токму затоа, Европската централна банка подолго време се залага за создавање вистински единствен европски банкарски пазар.