Еден од осудените силувачи на Жизел Пелико ја оспорува казната, една година по пресудата случајот повторно на суд

Помалку од една година по пресудатa за дрогирање и силување на Жизел Пелико што ја потресе Франција, апелацискиот суд разгледува случај на еден од осудените мажи, кој ја оспорува изречената казна за силување.

Хусаметин Доган, 44- годишен градежник, беше осуден во декември на девет години затвор за силување на Жизел Пелико. Тој и понатаму негира дека имал намера да ја силува и тврди дека бил измамен од нејзиниот поранешен сопруг, Доминик Пелико, кој ја дрогирал Жизел и ја нудел на непознати мажи преку интернет, а потоа го снимал силувањето.

Доган се појави на суд во Ним, Јужна Франција, во понеделник, по обвинението за силување со примена на супстанции што ја нарушуваат проценката или самоконтролата.

Во првичната постапка, поранешниот сопруг на Жизел Пелико и 50 други мажи беа осудени за сексуален напад врз неа помеѓу 2011 и 2020 година додека таа била под хемиска терапија. Пелико беше осуден на 20 години затвор, додека казните за другите обвинети се движеа од три до 15 години.

Судењето привлече меѓународно внимание и ја претвори Жизел Пелико во глобална икона откако таа побара јавно судење, по што судот застана на нејзина страна.

Доказите вклучуваа ужасни домашни видеа од злоупотребата што нејзиниот сопруг ги снимал во нивниот дом во малиот град Мазан во Прованса и на други места.

На денот на отворањето на судењето, таа изјави: „Немам од што да се срамам. Срамот мора да ја смени страната“.