Двајца пилоти се повредени при падот на рускиот борбен авион Су-30 за време на тренинг лет во Калининградската област, додека причината за несреќата сè уште не е позната.
Руски борбен авион Су-30 се урна за време на тренинг лет во регионот Калининград во неделата, потврди руското Министерство за одбрана. Несреќата се случила во силно милитаризираната руска енклава на Балтичкото Море, која граничи со Полска и Литванија.
Министерството за одбрана не даде детали за причината за несреќата. Се наведува дека екипажот се катапултирал и бил евакуиран од страна на тимовите за пребарување и спасување, но не се наведува дали пилотите се повредени.
Телеграмскиот канал „Маш“, кој се смета за близок до Кремљ, објави дека авионот се урнал во близина на градот Черњаховск, околу 90 километри источно од Калининград. Според истиот извор, двајцата пилоти се повредени и однесени во воена болница.
Тензии околу Калининград
Су-30 е двоседен повеќенаменски борбен авион дизајниран да напаѓа цели во воздух и на земја. Москва нагласи дека не носел оружје во времето на несреќата.
Авионските несреќи за време на вежби за обука, понекогаш со фатални последици, не се невообичаени во Русија. На пример, во септември, авион Ту-95 се урна во регионот Амур. Шест члена на екипажот загинаа, а еден беше повреден во несреќата, објави Интерфакс на 29 септември, што беше потврдено од руското Министерство за одбрана.
Инцидентот се случил во време на зголемени тензии меѓу Русија и НАТО околу Калининград. Литванскиот министер за внатрешни работи Мартинас Кателинас затоа побара испраќање дополнителни воени сили на границата со руската енклава.
