Градоначалникот на Општина Делчево, Иван Гоцевски, вчера, во својот кабинет, оствари работна средба со Ашок Џеин, директор на индиската компанија „Кришна ламикоут ПВТ Лимитед“.
Како што информираше Гоцевски, средбата е реализирана по заедничка иницијатива на индискиот бизнисмен и претставниците на локална приватна компанија од Делчево, со цел разгледување на можностите за потенцијална деловна соработка.
– На состанокот разговаравме за можностите за инвестиции во Делчево, за расположливите ресурси од различен капацитет, како и за законските рамки врз основа на кои би можела да се реализира евентуалната соработка. Посебно ме радуваат позитивните впечатоци и првите импресии што ги сподели нашиот гостин за убавините и за потенцијалите што ги нуди Општината – изјави Гоцевски.
Тој нагласи дека локалната самоуправа е подготвена да обезбеди целосна поддршка за сите сериозни инвеститори што имаат интерес да вложат во Делчево.
– Го уверив Џеин дека Општина Делчево, со целиот свој административен и институционален капацитет, ќе биде ставена во функција на неговите потреби и планови доколку се донесе одлука за конкретни инвестиции во нашата општина – нагласи Гоцевски.
Од Општина Делчево оценуваат дека ваквите средби се значаен чекор во насока на привлекување странски инвестиции и на отворање нови можности за економски развој на локално ниво.
Локалната самоуправа и во иднина ќе продолжи активно да работи на промоција на инвестициските потенцијали на Делчево и на создавање поволна деловна клима за домашните и за странските инвеститори.
