Бела куќа: Меланија Трамп договори примирје во украински град под руска контрола

Првата дама на Соединетите Држави, Меланија Трамп, договори примирје меѓу Русија и Украина во украинскиот град Олешки, кој е под руска контрола. Примирјето треба да стапи на сила на 29 октомври, соопшти денеска Белата куќа.

Жителите на градот – кој се наоѓа во регионот Херсон во јужна Украина и е под руска окупација од февруари 2022 година – предупредија на влошување на кризата со залихите на храна.

„Двете нации се согласија на привремен прекин на сите воени дејствија во Олешки, со цел да се овозможи влез на хуманитарна помош и да се олесни евакуацијата на цивилите преку одреден безбеден коридор“, се наведува во соопштението на Белата куќа, пренесено од агенцијата Ројтерс.

Во својата изјава, Меланија Трамп ја опиша ситуацијата во Олешки како крајно тешка.

„Олешки е град на линијата на фронтот, кој се наоѓа на работ на катастрофа. Преостанатото население се главно постари лица на кои им е итно потребна медицинска помош, лекови, храна и чиста вода“, изјави Меланија Трамп.

Овој развој на настаните уследи по засилениот притисок од страна на американскиот претседател Доналд Трамп врз украинскиот претседател Володимир Зеленски, со цел да се постигне договор со рускиот претседател Владимир Путин за ставање крај на војната, која започна со руската инвазија врз Украина во февруари 2022 година.

Според првата дама на САД, прекинот на огнот ќе им овозможи на цивилните тимови од двете земји да ги посетат жителите во нивните домови и да организираат транспорт за оние што сакаат да се евакуираат, било во Русија или во Украина. Овие тимови ќе бидат придружувани од американска медиумска организација (чиј назив не се наведува), која ќе го документира процесот.

Како што се наведува, Меланија Трамп и нејзините претставници работеле директно со украинското и руското раководство за да ги утврдат условите за локално примирје меѓу двете страни.

Во градот Олешки останале меѓу 1.700 и 2.000 жители – главно постари лица, како и околу 50 деца – што претставува значително намалување во споредба со предвоеното население од приближно 24.000 луѓе.

Според податоците на Белата куќа, околу 90 отсто од градот биле поплавени по уништувањето на браната Каховка.