Рускиот претседател Владимир Путин се подготвува за голема парада по повод 80-годишнината од победата над нацистичка Германија, пишува денес агенцијата „Франс-прес“, наведувајќи дека Денот на победата на 9 мај се одбележува по четврти пат во сенка на војната во Украина и дека рускиот лидер очекува околу дваесет светски лидери во Москва, вклучувајќи го и српскиот претседател Александар Вучиќ.
Се очекува дека заедно со Владимир Путин, на Црвениот плоштад на 9 мај ќе бидат присутни и кинескиот претседател Си Џинпинг и бразилскиот претседател Луиз Инасио Лула да Силва, како и претседателите на земјите традиционално сојузнички со Русија, како што се Казахстан, Белорусија, Ерменија, Азербејџан, Куба и Венецуела.
И покрај притисокот од Брисел, словачкиот премиер Роберт Фицо, како и српскиот претседател Александар Вучиќ, и претседателот на босанските Срби Милорад Додик, кој е баран од босанското судство, пренесува „АФП“.
„Асошиејтед Прес“ (АП) објави дека летовите до сите четири аеродроми околу Москва денес беа привремено прекинати поради нападот со украински дрон, додавајќи дека нападот со украински дрон се случил два дена пред едностраното 72-часовно примирје што Путин го објави за прославите на Денот на победата на 9 мај во Москва.
„АП“ додава дека меѓу странските лидери кои го потврдиле своето присуство на прославата е кинескиот претседател Си Џинпинг, кого Путин го нарече „главен гостин“.
Индискиот премиер Нарендра Моди, уште еден близок сојузник што Путин се обиде да го привлече, требаше да дојде во Москва, но го откажа патувањето поради тензиите со Пакистан.
Меѓу другите гости се популистичкиот словачки премиер Роберт Фицо, кој отворено ја оспорува политиката на Европската унија кон Украина, и српскиот претседател Александар Вучиќ, кој ја прифати поканата за она што ќе биде негова прва посета на Русија по инвазијата на Украина, но неговото присуство е неизвесно поради здравствени проблеми, објави „АП“.
