Адем Мекиќ: Ако продолжиме вака, Македонија ја чека светла иднина

По стартната победа кај Австрија во претквалификациите за пласман на Евтобаскетот 2029, во македонската кошаркарска репрезентација има позитивни вибрации.

Македонија од самиот почеток на мечот покажа дека победата е императив и со тоа не ѝ дозволи на Австрија ниту да се понадева на изненадување. Еден од оние што дадоа свој придонес за големиот триумф беше Адем Мекиќ. По натпреварот, македонскиот репрезентативец ги истакна колективниот пристап и начинот на кој целиот тим ги исполнил задачите.

• Извонреден резултат, добивме многу значаен натпревар. Знаевме дека Австрија ќе почне многу офанзивно и физички, па моравме да одговориме на истиот начин – изјави Мекиќ.

Тој особено ја нагласи енергијата со која влезе Македонија на натпреварот, но и големата самодоверба што ја покажаа репрезентативците.

• Многу сум горд на своите соиграчи и на стручниот штаб. Влеговме многу енергично и мотивирано, со голема самодоверба, а на крајот резултатот донесе една извонредна победа – додаде македонскиот кошаркар.

За Мекиќ, најважно е што Македонија функционира како колектив и секој играч ја прифаќа својата улога.

• Многу е важно што играме како тим. Знаеме кои се лидерите на оваа репрезентација, тука се Нено и Војдан, но секој има своја улога и сите максимално ги извршуваме задачите што ни се зададени – порача тој.

Убедливото издание против Австрија е дополнителен показател дека Македонија може да биде сериозен фактор во продолжението од претквалификациите.

Победата во Виена носи и голема доза самодоверба пред следните предизвици, особено затоа што беше остварена на гостински терен и против селекција што имаше големи амбиции.

• Ако продолжиме вака, мислам дека оваа репрезентација има светла иднина – заклучи Мекиќ.

Македонија со овој триумф испрати јасна порака дека има квалитет и потенцијал за големи резултати. Тимската игра, борбеноста и дисциплината беа главните оружја на Берокал, а доколку репрезентацијата продолжи во истиот ритам, навивачите имаат причина за оптимизам во продолжението од квалификацискиот циклус.