Жизел Пелико е одликувана со највисокото француско признание – ќе објави книга во која ќе ја раскаже својата приказна со свои зборови

Жизел Пелико, 72-годишната Французинка која минатата година привлече меѓународно внимание откако даде јавно сведочење на судење како жртва на масовно силување, е наградена со највисоката државна почест во Франција, Легијата на честа, објавува „Би-би-си“.

Пелико беше прогласена за витез на Легијата на честа на списокот на добитници објавен во пресрет на Денот на Бастилја, националниот празник на Франција.

Таа доброволно се откажа од правото на анонимност за време на судењето на нејзиниот сопруг Доминик Пелико, кој ја дрогирал и силувал речиси една деценија и довел десетици непознати мажи да ја злоупотребуваат додека таа била во несвест. Пелико е меѓу 590-те лица на кои денес им беше доделена престижната почест.

Судењето траеше неколку месеци, а таа беше присутна во судницата речиси секој ден. Заврши во декември минатата година кога 72-годишната Доминик Пелико беше осудена на максимална казна од 20 години затвор. За време на судењето, тој призна дека ја дрогирал сопругата и дека организирал околу 50 мажи да дојдат и да ја силуваат.

Ќе објави своја автобиографија

„Сакам сите жени кои биле силувани да можат да кажат: Госпоѓа Пелико го направи тоа, можам и јас“, изјави Жизел Пелико за новинарите, нагласувајќи дека сака „срамот да се префрли од жртвите на силувачите“.

Францускиот претседател Емануел Макрон јавно ѝ оддаде признание, нарекувајќи ја предводник и додавајќи дека нејзиното „достоинство и храброст ја допреле и инспирирале Франција и светот“.

Нејзиниот адвокат потврди дека автобиографска книга ќе биде објавена на почетокот на следната година во која Жизел Пелико ќе ја раскаже својата приказна со свои зборови.