Жителите на Газа реагираат: Хамас ја зацврстува контролата, ги оданочува цигарите и горивото, ја регулира цената на пилешкото

Од регулирање на цените на пилешкото месо, до оданочување на цигарите и на горивото, Хамас се обидува да ја прошири својата контрола врз Газа, додека американскиот план полека ја крои иднината на енклавата, тврдат жителите на Газа, кои се сомневаат дека Хамас ќе се откаже од власта како што вети.

Прекинот на огнот стапи на сила во октомври, а Хамас брзо ја врати контролата врз областите од кои се повлече Израел, егзекутирајќи десетици Палестинци што ги обвини за соработка со Израел, кражба или други злосторства, пишува „Индекс.хр“. Странските сили бараат групата да се разоружи и да ја распушти владата, но сè уште не се согласиле кој ќе ги замени. Сега некои жители на Газа велат дека сè повеќе ја чувствуваат контролата на Хамас на други начини.

Десетина жители на Газа, од кои тројца се директни трговци, изјавуваат дека властите следат сè што влегува во Газа контролирана од Хамас, наплаќајќи давачки за некои приватно увезени стоки, вклучувајќи гориво и цигари, и казнувајќи ги трговците за кои се смета дека премногу наплатуваат за стоката.

Но, шефот на канцеларијата за медиуми на владата на Хамас, Исмаил Ал-Тавабта, вели дека извештаите за оданочување на цигари и гориво се лажни. Според него, властите извршуваат само итни хуманитарни и административни задачи, додека вложуваат силни напори за контрола на цените. Тој ја повтори подготвеноста на Хамас да ја предаде власта на нова технократска влада.

Хатем Абу Далал, сопственик на трговски центар во Газа, рече дека цените се високи затоа што не влегува доволно стока во Газа, а владини претставници се обидуваат да воведат ред во економијата, одејќи наоколу, проверувајќи стоки и одредувајќи цени. Увозник на храна во Газа рече дека Хамас не се вратил на политиката на целосно оданочување, но дека „сè се набљудува и се евидентира“. Додаде дека тие следат сè што влегува, имаат контролни пунктови по патиштата, ги запираат камионите и ги испрашуваат возачите.

– Дали ќе му биде дозволено да продолжи да го прави ова? Мислам дека ќе продолжи додека не се воспостави алтернативна влада, рече Мустафа Ибрахим, активист и коментатор од градот Газа.