Цела Србија, но и Европа, го чекаше моментот кога легендарниот кошаркарски стручњак, Жељко Обрадовиќ, ќе ѝ се обрати на јавноста по повод оставката во тимот на Партизан. Минатата среда, тој објави дека го напушта тимот по новиот пораз во Евролигата и таквата одлука ги шокираше навивачите на белградскиот тим. Тие направија сè за да го премислат и се чинеше дека ќе успеат, но во саботата стигна студен туш и потврда дека тој навистина ја напушта клупата на Партизан.
Сега се појави и видео кое се чекаше со денови, а тоа беше обраќањето на Обрадовиќ во кое тој објасни зошто решил да ги спакува куферите и да го напушти својот сакан клуб.
- Минатата среда решив да направам исклучително тежок чекор, да ја преземам одговорноста за сè што тргна наопаку оваа сезона и, секако останав на мојата одлука. Добив безброј повици и пораки од сите вас, кои го имате Партизан во вашите срца, како што го имам и јас. Причината зошто ви се обраќам денес е тоа што ме замоливте да го сторам тоа. Одлуката што ја донесов беше многу тешка, а на сè што се случи потоа, не можев да влијаам. Многу ми е тешко да се сетам на сè низ што поминавме заедно со Партизан. Напишавме приказна што тешко дека некогаш ќе се повтори, но тоа зависи исклучиво од вас, навивачите на Партизан, кои создадовте атмосфера што е препознаена во светот. Вие сте најголемата сила на Партизан. Дури и во семејството, кога ќе се случи нешто, најдобро е да остане тоа во семејството. Имав можност да видам дека не сите луѓе се однесуваат така, дека се кажуваат работи што требаше да останат во клубот. Мојата изјава во средата, кога решив да ја преземам одговорноста за сè што се случува, беше таква изјава што беше многу кратка, сè уште стојам зад сè што кажав со таа изјава. Она што се случи потоа е нешто што не сакав да се случи – почна Обрадовиќ.
Тој, исто така, откри во моментот кога се раздели дека оставката е единственото решение во овој момент.
- Треба да разјаснам некои ситуации, во вторникот вечерта по натпреварот, што беше многу тешко за мене, разговарав со тренерскиот штаб и реков дека ова е мојот следен чекор. Тоа беше одлука за која бев сигурен дека е добра, пред сè за клубот и за продолжението на она што доаѓа за Партизан. Му ја соопштив оваа одлука на претседателот на клубот, разговорот беше коректен, тој ги разбра моите причини, рече дека ме видел на натпреварот и дека разбира дека тоа е единственото нешто што можам да го направам во тој момент. Се согласивме дека јас ќе бидам тој што ќе излезе јавно да го објави тоа и дека тоа нема да биде клубот. Договорот е дека ќе биде направено тоа следниот ден. За жал, информациите, како и секогаш, циркулираат, многу е тешко да се контролираат. Дојдоа до медиумите, излегоа во етерот, дека се подготвувам да поднесам оставка. Решив да објавам истиот ден и се обратив до вас, навивачите на Партизан. Го повикав портпаролот на клубот и го замолив да го повика претседателот и заедно да донесеме одлука дека е тоа сè. Тие се согласија со сè што напишав, само клубот, претседателот на клубот ме замоли да додадам во делот каде што ја прифаќам целата одговорност, дека тоа е неотповиклива оставка, бидејќи ќе им биде полесно нему и на членовите на Управниот одбор да излезат пред навивачите со тоа. Секако, се согласив со тоа. Тоа беше крајот – додаде Обрадовиќ.
На крај имаше и посебно обраќање до навивачите.
- Вие сте силата на Партизан, никогаш не откажувајте се од него и навивајте за него како секогаш. Од моја страна, ќе ви ветам дека секогаш ќе бидам тука за вас. Се надевам и посакувам ова да не биде последен пат да бидам во Партизан. Кога и како? Не можам да го кажам тоа сега – заврши Жељко Обрадовиќ.
