Кошаркарскиот клуб Партизан влезе во еден од најтешките периоди во последните десет години. По поразот од Панатинаикос, Жељко Обрадовиќ поднесе оставка и рече дека „не може повеќе“. Од тимот му се заблагодарија, но веќе следниот ден Управниот одбор на клубот ја отфрли оставката и го повика Жељко да се врати на својата позиција како главен тренер.
Следуваше бурна реакција од навивачите: на аеродромот „Никола Тесла“, илјадници „гробари“ го пречекаа Обрадовиќ како херој, испраќајќи јасна порака – го сакаат назад. Сепак, состанокот со Управниот одбор не донесе епилог. Обрадовиќ стои зад својата одлука, а „црно-белите“ официјално објавија дека нема враќање.
Во таква атмосфера, тимот не одржа тренинг еден ден подоцна бидејќи Марко Матовиќ одби да го води сè додека не беше јасно кој е тренер. Ова дополнително го продлабочи хаосот во кој се најде клубот само неколку дена пред натпреварот против Баерн, закажан за 4 декември.
Во средината на тензиите, за „Спорт Клуб“ се огласи и легендарниот Душко Вујошевиќ, човек кој ја одбележа модерната историја на Партизан. Неговата порака беше кратка – но исклучително јасна.
- Што да ви кажам, не знам ништо. Жал ми е што Партизан се руши. Подобро би им било да се подготват за наредните натпревари отколку да се војуваат меѓу себе. Точка, доста, порача Вујошевиќ.
Зборовите на Вујошевиќ дополнително ја илустрираат ситуацијата во која клубот од Хумска моментално изгледа поделен, без јасен план и без име на клупата само неколку дена пред еден од најтешките натпревари во Евролигата.
Навивачите на Партизан сè уште бараат враќање на Обрадовиќ, Управниот одбор вели дека го сака, но поранешниот шеф на стручниот штаб стои зад својата одлука – а хаосот се продлабочува со секој изминат час.
