Зголемени тензии пред истекот на ултиматумот: Трамп прави неочекуван потег?

Според иранската новинска агенција Фарс, повикувајќи се на висок функционер во Техеран, САД предложиле Џ.Д. Венс да преземе клучна улога во преговорите, заменувајќи го сегашниот претставник Стив Виткоф, објави руската новинска агенција ТАСС.

Изворот тврди дека Вашингтон сака да сигнализира подготвеност за „посериозен дијалог“, додека Виткоф е критикуван дека е близок до внатрешниот круг на израелскиот премиер Бенјамин Нетанјаху.

Според истиот извор, американскиот претседател Доналд Трамп наводно сака директна средба и постигнување договор со Иран.

Една од клучните причини за новиот пристап, тврди Техеран, е загриженоста на САД за евентуално зголемување на цените на енергијата уште следната недела, поради ескалацијата на конфликтот. Вашингтон, според овие тврдења, сака да избегне дополнителен шок за пазарите што би можел да има глобални последици.

Трамп претходно изјави дека постои реална шанса сегашните преговори со Иран да резултираат со договор до 7 април. Во исто време, тој постави ултиматум дека Техеран мора повторно да го отвори Ормутскиот теснец или да се соочи со напади врз енергетската и цивилната инфраструктура.

По почетниот рок, американскиот претседател го продолжи ултиматумот до вечерта на 7 април, по американско време, оставајќи простор за дипломатско решение.

Новиот предлог за промена на преговарачкиот тим би можел да биде обид за деескалација и отворање простор за договор, но сè уште не е јасно дали Техеран ќе се согласи со тоа.