Земјата на удар на „канибалска бура“: Импресивни прикази на Аруроа бореалис, но и потенцијално нарушување во комуникациите и електричните мрежи

Моќна сончева бура би можела да донесе зачудувачка претстава на Аурора Бореалис во Велика Британија вечерва – но исто така потенцијално да ги наруши GPS системите, комуникациите и електричните мрежи.

Британскиот геолошки завод (BGS) ја зголеми својата прогноза на највисоко ниво и објави дека тековната бура веќе ги нарушила комуникациите и сателитската навигација. Тие рекоа дека втората геомагнетна „канибалска бура“, која се храни од првата, би можела да стигне до Обединетото Кралство до раните попладневни часови и да биде една од најголемите во последните 20 години, пишува SkyNews.

Соларната бура е експлозија на честички, енергија, магнетни полиња и материјал исфрлен во вселената од Сонцето – и може да го наруши магнетното поле на Земјата, според НАСА.

Најновиот настан веќе го создаде најсилното геоелектрично поле на земјата откако BGS води евиденција. Бурата предизвика импресивни прикази на аурора во делови од Велика Британија преку ноќ, а истото би можело да се случи повторно вечерва – под услов небото да е ведро и темно.

Боите на аурората се создаваат кога наелектризирани честички од Сонцето удираат во атоми и молекули во горните слоеви на атмосферата на Земјата. Сончевите бури можат да патуваат од Сонцето до Земјата за само 17 часа, но понекогаш патуваат многу подолго.

Најновиот би можел да достигне врвна јачина од G5, според BGS – ниво кое предупредува на можни прекини на електричната енергија, проблеми со GPS што би можеле да траат со денови и тешкотии во ориентирањето на вселенските летала.

НАСА наведува дека сончевите бури не предизвикуваат директна штета на луѓето бидејќи магнетното поле и атмосферата на Земјата нè штитат од најлошите ефекти.