Министерството за финансии ја издаде еврообврзницата во две транши од по 500 милиони евра, со историски ниски каматни стапки. Министерката Гордана Димитриеска-Кочоска истакнува дека ќе се искористат дел од средствата за предвремен откуп на стари обврзници, а остатокот за финансирање на буџетскиот дефицит и за развојни проекти, со цел да се обезбеди стабилност и рамномерно распределување на достасувањата во наредните години
Министерството за финансии успешно ја реализираше аукцијата за издавање на 10. еврообврзница, со што државата обезбеди средства под едни од најповолните каматни услови во последните дваесет години. Според министерката за финансии, Гордана Димитриеска- Кочоска, ваквиот резултат е јасна потврда за довербата на меѓународните инвеститори во економските политики и стабилноста на земјата.
– Каматните услови што ги обезбедивме се меѓу најповолните во регионот и пошироко, што дополнително ја зацврстува позицијата на државата како стабилен и кредибилен издавач на меѓународните финансиски пазари – изјави Димитриеска-Кочоска.
Еврообврзницата е издадена во две транши од по 500 милиони евра, со рок на достасување од 4 и од 8 години. Каматната стапка за четиригодишната транша изнесува 3,875 проценти, а за осумгодишната 4,75 проценти, што претставува најтесна каматна маргина во однос на референтниот еурибор во споредба со сите државни издавања во последните дваесет години.
– Особено значајно е што успеавме да пласираме осумгодишна еврообврзница – достасување што последен пат беше постигнато пред повеќе од 20 години. Тоа е силен сигнал за довербата во економските политики, реформската агенда и стабилноста на државата – истакна министерката.
Интересот на инвеститорите бил исклучително висок. Само еден час по објавувањето на почетните каматни стапки, побарувачката достигнала околу две милијарди евра, а пред отворањето на американскиот пазар, надминала три милијарди евра. По неговото отворање, понудата пораснала на повеќе од четири милијарди евра, со интерес од над 150 глобални инвеститори од Европа и од САД.
Министерката нагласи дека одлуката за задолжување е донесена врз основа на внимателна анализа и со јасна одговорност кон јавните финансии.
– Нашата цел не е само редовно сервисирање на обврските туку и создавање одржлива и стабилна фискална рамка, со помал притисок од отплати и со повеќе простор за суштински реформи – рече Димитриеска-Кочоска.
Како дел од стратегијата за намалување на фискалниот товар, Министерството за финансии ќе реализира и предвремен откуп на еврообврзницата што достасува во јуни 2026 година.
– Со оваа одлука, ќе оствариме заштеди што во значителен дел ќе ги компензираат трошоците од новото издавање – посочи таа, додавајќи дека трошоците за Синдикатот на банки и за правните советници се најниски досега.
Со средствата обезбедени преку оваа еврообврзница, планирана во буџетот за 2026 година, ќе се изврши исплата на еврообврзницата издадена во 2020 година, во износ од 700 милиони евра, а другите средства ќе бидат насочени кон финансирање на буџетскиот дефицит и кон развојни проекти.
– Иако номиналниот износ на задолжувањето изнесува една милијарда евра, нето-ефектот врз јавниот долг е значително понизок и целосно усогласен со среднорочната фискална рамка – нагласи министерката, додавајќи дека ова издавање има јасна улога во рамномерното распределување на достасувањата и во намалувањето на ризиците во наредниот период.
Издавањето на еврообврзницата е согласно со напорите на Министерството за финансии за адекватно управување со јавниот долг и да се одржи стабилноста на јавните финансии на среден и на долг рок. Државата стана првата земја во регионот и прва земја надвор од Европската Унија што излегува на меѓународниот пазар на капитал, што сведочи за довербата во напорите на Министерството за финансии, особено имајќи го предвид износот на задолжувањето.
Во 2026 година, вкупните обврски за отплата на домашниот и на меѓународниот пазар изнесуваат околу 1,563 милијарди евра, во 2027 година 1,579 милијарди евра, во 2028 година 1,971 милијарда евра, во 2029 година 1,304 милијарди евра, а во 2030 година 1,414 милијарди евра или вкупно за пет години 8,804 милијарди евра. Токму затоа, потенцираше Димитриеска-Кочоска, ова издавање има јасна улога во рамномерното распределување на достасувањата и во намалувањето на ризиците поврзани со концентрацијата на отплати во одделни години.
(С. Бл.)
