Украинскиот претседател Володимир Зеленски се состана со американскиот потпретседател Џ.Д. Венс и државниот секретар Марко Рубио на маргините на инаугурацијата на папата Лав во неделата.
Тоа е прва средба меѓу Зеленски и Венс откако тие се судрија на состанокот во Белата куќа за војната во Украина во февруари.
Зеленски, кој се обидува да ги обнови врските со Вашингтон по таа катастрофална посета, разговараше во Рим во неделата со потпретседателот Венс и државниот секретар Марко Рубио.
По разговорот Зеленски рече дека средбата била „добра“. Тој објави фотографии од украински и американски функционери како седат надвор на тркалезна маса и се смеат.
Украинските медиуми јавија дека средбата траела 40 минути.
„Повторив дека Украина е подготвена да се вклучи во вистинска дипломатија и ја истакнав важноста од целосен и безусловен прекин на огнот што е можно поскоро“, рече Зеленски.
По инаугуративната миса, Зеленски се сретна со новиот поглавар на Католичката црква, папата Лав.
Украина и Русија во петокот ги одржаа своите први директни разговори по повеќе од три години, сите под притисок на Трамп, кој сака тие да се согласат на прекин на огнот и да ја прекинат војната. По преземањето на претседателската функција, тој вети дека многу брзо ќе ја заврши војната.
Завојуваните страни се согласија да разменат по 1.000 затвореници, но не успеаја да се согласат на прекин на огнот, откако Москва постави свои услови, кои член на украинската делегација ги нарече „неточни“.
Лидерите на Велика Британија, Франција, Германија и Полска планирале да разговараат со Трамп пред американскиот и рускиот претседател да разговараат во понеделник, објави во неделата германскиот канцелар Фридрих Мерц, пренесе N1.
