Зеленски за „Северен тек“: „Украина никогаш официјално не учествувала во саботажата“

Украинскиот претседател Володимир Зеленски повтори дека неговата земја немала никаква улога во саботажата на гасоводот „Северен тек“ во 2022 година, кој носеше руски гас до Германија, пренесе агенцијата Франс-прес.

Германските обвинители минатиот месец заклучија дека експлозиите на гасоводот биле извршени по налог на украинската држава, обвинение што веројатно би можело да ги комплицира односите меѓу Киев и Берлин, еден од нејзините главни воени поддржувачи.

„Украина никогаш официјално не учествувала во никаква операција поврзана со саботажата на „Северен тек“, изјави Зеленски за новинарите во неделата кога беа прашани за истрагата.

Украинскиот шеф на државата, кој отсекогаш негираше каква било вмешаност од страна на неговата земја, додаде дека Германија е „целосно свесна дека Украина не е одговорна ниту за спроведување ниту за планирање на оваа операција“.

Тој рече дека Киев му помага на Берлин во истрагата и изрази надеж дека случајот нема да им наштети на нивните односи.

„Многу е важно да не го изгубиме партнерството, да не ја изгубиме довербата на европските земји кои ѝ помагаат на Украина од самиот почеток на оваа војна“ против Русија, додаде Зеленски.

Украински државјанин беше уапсен во Хрватска во среда под сомнение за вмешаност во саботажата на гасоводот. Тој наводно работел на филм за нападот. Според германските обвинители, човекот соработувал со друг Украинец, уапсен во Италија минатата година, пред да биде депортиран во Германија.