Украинскиот претседател Володимир Зеленски денес изјави дека САД премногу често бараат отстапки од Украина, а не од Русија, но сепак се надева дека продолжувањето на преговорите за завршување на војната ќе биде сериозно и суштинско. По минатонеделниот состанок на руските и украинските воени претставници во Абу Даби, преговорите меѓу Украина, Русија и САД се преместуваат во Женева следната недела.
Сите страни нагласуваат дека речиси 90 проценти од договорот е договорен, но остануваат најтешките прашања, територијата и нуклеарната централа Запорожје.
- Искрено се надеваме дека трилатералните состаноци следната недела ќе бидат сериозни и суштински, дека ќе ни помогнат. Но, искрено, понекогаш чувствувам дека страните зборуваат за сосема различни работи, рече Зеленски на Минхенската безбедносна конференција.
Тој додаде дека чувствува мал притисок од американскиот претседател Доналд Трамп, кој вчера го повика да не ја пропушти можноста наскоро да се постигне мир.
- Американците често се враќаат на прашањето за отстапки, а премногу често овие отстапки се дискутираат само во контекст на Украина, а не на Русија, истакна тој.
