Украинскиот претседател Володимир Зеленски изјави дека разговарал со специјалниот претставник на американскиот претседател Доналд Трамп, Стив Виткоф, и зетот на Трамп, Џаред Кушнер, за тоа како да се заврши војната со Русија.
„Беше навистина добар разговор, разговаравме за многу детали. Постојат некои нови идеи за тоа како да се приближиме до вистински мир, а тоа се однесува на форматот, состаноците и временската рамка“, објави Зеленски на „Телеграм“.
Трамп се залага за договор за прекин на речиси четиригодишната војна, а мировните напори предводени од Виткоф и Кушнер напредуваат бавно во последните недели. Порано оваа недела, Зеленски презентираше нацрт-план за мир од 20 точки што го опиша како главна рамка за прекин на војната.
Нацртот е разводнета верзија на оригиналниот план од 28 точки што претходно го дискутираа САД со руската страна, за кој се верува дека најмногу ѝ одговарал на Москва бидејќи барал од Киев да отстапи територија и да ја ограничи големината на својата војска.
Клучните територијални прашања остануваат нерешени во новиот нацрт-план од 20 точки, рече Зеленски, додавајќи дека ќе биде потребна средба со Трамп за да се решат најчувствителните прашања, пренесе „Хина“.
Портпаролот на Кремљ, Дмитриј Песков, претходно денес изјави дека Москва анализира документи за крајот на војната што ги донесе во Москва рускиот специјален претставник Кирил Дмитриев од Соединетите Американски Држави. Белата куќа не одговори веднаш на барањето за коментар.
Сепак, портпаролката на руското Министерство за надворешни работи, Марија Захарова, го отфрли како лажен извештајот на „Блумберг“ за руските измени на мировниот план на САД, тврдејќи дека медиумот немал сигурни извори блиски до Кремљ. Реакцијата дојде откако Володимир Зеленски презентираше план од 20 точки, кој Москва го смета само за почетна точка за преговори и со кој не е задоволна, особено во врска со прашањата за Донбас, НАТО и големината на украинската армија.
Зеленски рече дека главниот преговарач на Украина, Рустем Умеров, планира да има уште еден разговор со американските преговарачи вечерва.
„Навистина работиме 24/7 за да ставиме крај на оваа брутална руска војна против Украина и да обезбедиме сите документи и чекори да бидат реални, ефикасни и сигурни“, рече Зеленски.
