Соединетите Американски Држави (САД) побараа од Украина да одржи претседателски избори до 15 мај, заедно со референдум за каков било мировен договор со Русија, а според изворите, украинските власти веќе започнаа со подготовките за гласањето под силен притисок од Белата куќа.
Според весникот „Фајненшл тајмс“, САД го условија обезбедувањето безбедносни гаранции од страна на Киев со одржување претседателски избори до 15 мај истовремено со референдумот за мировниот договор со Русија.
Според изворите, украинските власти веќе започнаа со подготовките за организирање на тие две гласања, а во случај на пропуштање на рокот, Киев би можел да остане без понудените гаранции од Вашингтон.
Украинските и западните претставници тврдат дека Киев се согласил со овој план под силен политички притисок од Белата куќа, која се стреми да ги прекине руско-украинските мировни преговори напролет.
Според информациите од „Фајненшл тајмс“, украинскиот претседател Володимир Зеленски би можел да објави одлука за одржување избори и референдум на 24 февруари, на четвртата годишнина од почетокот на руската воена операција.
Извори блиски до Зеленски наведуваат дека украинското раководство јасно ѝ ставило до знаење на американската администрација дека е подготвено за „исклучително кратки рокови“ за организирање на гласањето, „и покрај логистичките тешкотии за одржување избори во воени услови“.
Неименуван западен функционер изјави дека „меѓу Украинците е создаден силен впечаток дека сето ова мора да биде поврзано со реизборот на Зеленски“.
Последните претседателски избори во Украина се одржаа во 2019 година, а ново гласање требаше да се одржи во март 2024 година. Поради воената состојба во земјата, изборите потоа беа одложени на неодредено време.
Во декември 2023 година, Владимир Зеленски изјави дека е подготвен да организира избори во следните 60 до 90 дена доколку Соединетите Американски Држави и европските земји помогнат во обезбедувањето безбедно одржување на гласањето.
