Зеленски ја прекина посетата на Германија, итно се врати во Украина поради закана од руски напад на Суми

Спротивно на планот, украинскиот претседател Володимир Зеленски не присуствуваше на свечената церемонија на доделување на наградата Карло Велики во германскиот град Ахен. Според информациите на „Шпигел“, поради заканата од руски напад врз Суми, тој се вратил директно од Берлин во Киев.

Пред две години, тој лично ја доби наградата „Карло Велики“ во Ахен. Овој пат,  планираше да присуствува на церемонијата на доделување на наградата, која ѝ беше врачена на претседателката на Европската комисија, Урсула фон дер Лајен.

По политичките разговори во Берлин, тој планирал да го продолжи своето патување кон Рајна. Сепак, според германските медиуми, неговите планови за патување одеднаш се промениле. Поради сериозната ситуација во Украина, Зеленски не патувал од Берлин до Дизелдорф, а потоа во Ахен, туку, според безбедносни извори, веднаш се вратил во Киев.

Главната причина беше концентрацијата на руските сили во близина на градот Суми. Зеленски, најверојатно, сметал дека е несоодветно да учествува на свечен настан во странство, со оглед на моменталната ситуација.

Според украински извори, Русија собрала околу 50.000 војници за евентуална офанзива во североисточниот регион на Украина.Украинскиот претседател разговараше со германскиот канцелар Фридрих Мерц и доби нови ветувања за воена помош.Зеленски се сретна и со претседателот на Сојузна Република Германија, Франк-Валтер Штајнмаер, и со претседателката на Бундестагот, Јулија Клекнер.