Зеленски испраќа „документ од историско значење“ во Вашингнон со барање да биде разгледан на највисоко ниво

Украинскиот претседател Володимир Зеленски го слушна деталниот извештај од преговарачкиот тим за контактите со американската страна и нареди финализирање на документ за безбедносни гаранции за Украина.

Украинската делегација дефинираше јасен план за дејствување за следните 14 дена, што вклучува подготовка на документи и подготовка за нивно евентуално потпишување.

„Наредив финализирање и поднесување за разгледување на највисоко ниво на документот на Соединетите Американски Држави за безбедносни гаранции за Украина. Ова треба да биде документ од историско ниво, а токму ова е нивото што го достигнува текстот“, рече Зеленски на Телеграм, според украинскиот јавен радиодифузер Суспилне.

Според него, текстот достигнува ниво што ќе ја обезбеди стратешката одбрана на земјата.

„Основна политичка рамка“

Украинскиот премиер Јулија Свириденко и економскиот блок на владата добија задача да обезбедат експертиза за договорите во формат Украина-САД и трилатералните договори Украина-Европа-Америка, додаде Зеленски.

„Ги утврдивме потребните параметри за механизмите за користење на средствата за реконструкција што ќе дојдат од нашите партнери“, рече тој.

Зеленски потврди дека американската страна е во комуникација со Русија во врска со „основната политичка рамка“ за завршување на војната.

„Ја формулиравме нашата визија и мора да има јасна повратна информација од Русија за тоа дали се подготвени да ја завршат војната под реални услови. Доколку нема таква подготвеност, притисокот врз агресорот мора да продолжи да се зголемува“, нагласи Зеленски.

„Максимално ограничување на приходите од рускиот извоз“

Тој посочи на „ефикасноста на тактиките за борба против флотата на танкери во сенка и финансиските шеми за заобиколување на санкциите“.

Тој повика на проширување на овие практики и на Русија, така што, во случај на одбивање да се склучи мир, „одговорот на светот би бил максимално ограничување на приходите од рускиот извоз“.

Зеленски најави состанок за да се разговара за потребите на Украина за нови ракети за воздушна одбрана.

Претседателот разговараше за прашања поврзани со воздушната одбрана и снабдувањето од партнерите со Врховниот командант на вооружените сили на Украина, Сирски.

Дополнително, според него, Украина планира распоред на состаноци и понатамошни преговори со САД во врска со мировниот план,пренесе „Танјуг“.