Зеленски и Туск разговараа за отворање кластер во врска со членството на Украина во ЕУ

Украинскиот претседател Володимир Зеленски и полскиот премиер Доналд Туск денес разговараа за изборите во Полска, војната во Украина и отворањето кластер во преговорите за членство на Украина во ЕУ.

Зеленски на својот Телеграм канал изјави дека е важно Полска да остане сигурен партнер и пријател на Киев.

„Многу, пред сè, безбедноста, зависи од нашето единство, заедничката позиција и координираните чекори“, напиша Зеленски, според Суспилне.

Тој го информираше Туск за неговиот разговор со американскиот претседател Доналд Трамп и европските лидери во понеделник.

„Разговарав за подготовката на нашите следни чекори. Притисокот врз Русија како одговор на продолжувањето на војната треба да биде опиплив. Исто така, ги координиравме ставовите за потребата од отворање на првите кластери за време на полското претседателство со ЕУ. Украина, од своја страна, направи сè што е потребно и го заслужува тоа“, истакна украинскиот лидер.

Тој му се заблагодари на Туск за неговата поддршка и подготвеност да придонесе на патот на Украина кон европската интеграција.

Украинскиот претседател претходно ја повика ЕУ да го забрза отворањето на кластери во преговорите за приклучување кон европскиот блок.

Зеленски истакна дека „една земја-членка не може да блокира одлуки што се важни за целиот континент“ и го повика Советот на ЕУ да го направи донесувањето одлуки во унијата пофлексибилно, објави Танјуг.

Унгарија го блокираше отворањето на кластери во преговорите за пристапување на Украина кон ЕУ од почетокот на 2025 година, оценувајќи дека „членството на Украина во ЕУ ќе биде товар и за блокот и за Унгарија“.