Зелени знаци за засолништа се шират низ Европа: Граѓаните во неизвесност, стравот од можна војна расте

Како што расте стравот од можен конфликт, властите ја обновуваат мрежата на засолништа и ја зајакнуваат цивилната заштита како подготовка за потенцијален конфликт.

Во главниот град на Латвија, Рига, на десетици згради се поставени впечатливи зелени знаци со стилизирано семејство и зборовите „patvertne“, што значи засолниште, станувајќи еден од многуте симболи на воена подготвеност во градот кој нервозно гледа кон својот источен сосед, Русија, објавува NBC News.

Стравувањата од руска агресија растат во Латвија и нејзините балтички соседи, Естонија и Литванија, особено по појавата на авиони и сомнителни беспилотни летала по должината на источниот дел на НАТО, што ги затвори аеродромите во неколку европски земји, вклучувајќи ги Германија, Данска и Норвешка.

„Ние сме на првата линија. Ние сме земји од источниот дел. Ние сме соседи на Русија, агресивни земји“, изјави за NBC претходно овој месец на конференција во Рига летонскиот министер за одбрана Андрис Спрудс.

Тој додаде дека Латвија, која започна иницијатива за беспилотни летала претходно оваа година, до одреден степен „веќе развила одредена отпорност“ во услови на каква било агресија на Кремљ.

Советникот за национална безбедност на латвискиот премиер Аирис Риквеилис нагласи дека неговата земја не се фокусира само на воените капацитети, туку и на она што тој го нарече „подготовка на граѓанското општество“.

Линда Озола, до неодамна заменик-градоначалничка на Рига, го надгледуваше реновирањето на мрежата на засолништа, а нејзиниот тим ги пребаруваше архивите за да пронајде стари планови и локации, од кои многу се во запуштена состојба.

Службите за итни случаи идентификуваа стотици постоечки засолништа, а законодавството е ажурирано за да се овозможи изградба на нови.

Дел од финансирањето за подобрување на инфраструктурата за цивилна заштита е обезбеден со договор од 85 милиони евра, објави NBC.

На конференцијата во Рига, и други учесници, исто така, зборуваа за можноста за директен конфликт меѓу НАТО и Русија.

„Првиот истрел од следната војна нема да бидат тенкови низ превојот Сувалки“, рече Метју Витакер, американскиот претставник во НАТО, осврнувајќи се на тесниот копнен коридор што се смета за потенцијална точка за напад.

Тој процени дека првиот удар ќе биде сајбер напад и „онеспособување на аеродром или критична инфраструктура“.

Адмиралот Роб Бауер, поранешен претседател на воениот комитет на НАТО, исто така посочи дека новиот конфликт со Русија ќе се води „на поинаков начин“, истакнувајќи дека, за разлика од Украина, НАТО има силни воздухопловни и поморски сили.