Зелена иновација од Македонија – најдобра во светот

Проектот „Најдобар бизнис концепт за зелена иновација“ од Македонија ја освои престижната Награда за зелени вештини за 2025 година, соопшти Европската фондација за обука за време на Деновите на енергија ЕУ-Италија, кои се одржаа на Политехнико ди Торино.

Иницијативата демонстрира како зелено претприемништво може да го претвори образованието во практични решенија за еколошките предизвици, овозможувајќи младите да развиваат, тестираат и да испробуваат идеи со реално влијание во општеството и економијата.

Проектот од Македонија се издвои на првото место меѓу петте финалисти, кои беа избрани од повеќе од 250 апликации од над 50 земји ширум светот.

Наградата за зелени вештини се доделува од 2021 година и има за цел да промовира иновативни практики што поддржуваат циркуларни и карбон-неутрални економии. Во текот на петте изданија на натпреварот, за оваа награда конкурирале повеќе од 1.350 апликации од над 60 земји, генерирајќи над 57.000 гласови од јавноста.

Проектот од Македонија е долгогодишна иницијатива која вклучува ученици од средни училишта и универзитети заедно со нивните наставници. Целта е развивање практични решенија за еколошките предизвици преку зелено претприемништво. Иницијативата е активна повеќе од 18 години, вклучува повеќе од 100 ученици и студенти, како и повеќе од 50 наставници секоја година, и генерира повеќе од 35 идеи за зелен бизнис годишно.

– Освојувањето на оваа награда е огромно признание за работата на нашиот тим во помагањето на наставниците и учениците да усвојат поеколошки начин на размислување. Овој вид натпревари покажува колку се талентирани младите луѓе и зошто едукацијата за одржливост треба да започне од рана возраст низ целиот образовен систем – изјави проф. Радмил Поленаковиќ од Машинскиот факултет.

Новиот повик за аплицирање за Наградата за зелени вештини 2026 е официјално објавен. Апликациите се поднесуваат преку онлајн платформата на англиски јазик, а пријавите на други јазици се прифаќаат и се преведуваат за евалуацијата. Иницијативите се оценуваат од независни експерти според влијание, оригиналност, мерливост и инклузивност.