Заврши втората рунда преговори, неизвесноста останува: Иран и САД се тек на почетокот од патот кон договор

Втората рунда индиректни разговори меѓу Иран и САД за нуклеарната програма на Иран заврши во Женева по околу четири часа разговори, без конкретен договор, но со знаци на ограничен напредок, објави Ал Џезира.

Според иранските државни медиуми, делегациите се состанале во конзулатот на Оман, кој посредувал меѓу двете страни. Разговорите се фокусирале на техничките аспекти на потенцијалниот договор, вклучувајќи нуклеарни, правни и економски прашања. Иранската делегација ја предводеше министерот за надворешни работи, Абас Арагчи, додека американската страна ја претставуваа Стив Виткоф и Џаред Кушнер.

Арагчи по состанокот изјави дека атмосферата била „сериозна и конструктивна“, но предупреди дека тоа не значи дека е блиску до договор. Тој рече дека двете страни постигнале договор за некои основни принципи и сега ќе работат на изготвување договор, што може дополнително да го забави процесот. Тој, исто така, потврди дека датумот за третата рунда разговори сè уште не е одреден.

Аналитичарите предупредија дека краткото траење на разговорите може да укажува на длабоки разлики. Али Ваез од Меѓународната кризна група рече дека разговорите можеби завршиле брзо бидејќи разликите меѓу страните биле премногу големи или бидејќи преговарачите немале трпение. Тој потсети дека биле потребни повеќе од две години интензивни преговори за да се постигне нуклеарниот договор од 2015 година.

Врховниот лидер на Иран, Али Хамнеи, дополнително нагласи дека разговорите мора да вклучуваат компромис, предупредувајќи дека секое наметнување на американски услови би го поткопало самиот процес.

Иран повтори дека не се стреми да развива нуклеарно оружје, но инсистира на своето право да збогатува ураниум за цивилни цели, во согласност со меѓународните договори. Во исто време, остануваат несогласувања околу барањата на САД за ограничување на иранската програма за балистички ракети.

Довербата меѓу двете страни останува сериозно нарушена, особено по повлекувањето на САД од нуклеарниот договор во 2018 година и последователните воени напади врз иранските нуклеарни постројки.

Иако двете страни се согласија да продолжат да работат на нацрт-договорот, клучните политички и безбедносни разлики остануваат, што значи дека исходот од преговорите останува неизвесен.