Затворска криза во Холандија: Над 3.300 осуденици чекаат казна на слобода

Поради пренатрупаноста во холандските затвори, околу 3.300 осудени криминалци се на слобода додека чекаат да почнат да ги издржуваат своите казни, објавија денес локалните медиуми.

Осудените кои чекаат да започнат со издржување на своите затворски казни се осудени на вкупно 584 години затвор, објави NL Times.

Холандската агенција за извршување на кривични санкции (DJI) предупреди дека затворскиот систем се соочува со структурен недостиг на ќелии и дека некои затвореници се ослободуваат предвреме, додека илјадници други чекаат да започнат со издржување на своите казни.

Генералниот директор на DJI, Вим Сарис, предупреди дека ваквите феномени придонесуваат за пад на јавната доверба во владеењето на правото.

Тој, исто така, нагласи дека затворскиот систем треба да се реорганизира, вклучувајќи построг надзор на осудените лица во домашен притвор, програми за постепена реинтеграција, како и затвори со минимална безбедност за помалку опасни осуденици.

Холандскиот парламент веќе усвои некои од итните мерки за справување со кризата, вклучително и воспоставување привремени затвори и употреба на притворски бродови, а десетици милиони евра се издвоени за проширување на капацитетот на затворите.