Заловени повеќе напуштени кучиња што шетаа по гробовите во Бутел

Јавното претпријатие „Лајка“ изминатата недела спровело интензивни активности за заловување на напуштените кучиња што шетаа по гробовите во Бутел.

– По алармантниот пораст на случаи на напуштање кучиња во околината на Градските гробишта Бутел, изминатата недела интензивно работевме на терен за да ги заловиме напуштените животни и да спречиме понатамошна нивна репродукција на оваа локација – соопштија од претпријатието.

Оттаму додаваат, нивните теренски екипи секојдневно биле присутни на оваа локација и биле заловени повеќе кучиња.

– Сите животни беа безбедно транспортирани во прифатилиштето, каде што ќе добијат соодветна нега, ветеринарен преглед, ќе поминат хуман третман и ќе бидат подготвени за вдомување – објаснија од ЈП „Лајка“.

Од претпријатието велат дека ќе продолжат овие активности и во наредниот период, во соработка со инспекциските служби и надлежните институции, нагласувајќи дека нивни приоритет се заштитата на животните и обезбедувањето безбедна средина за граѓаните.

Тие повторно апелираат до граѓаните да не ги напуштаат животните, бидејќи напуштањето е казниво дело.

– Пријавувајте сомнителни активности или напуштање животни на јавни површини. Размислете за вдомувањето или за стерилизацијата како одговорен чекор – препорачуваат од ЈП „Лајка“, додавајќи дека остануваат посветени на хуманото и одговорно решавање на проблемот со бездомните животни, но, како што наведуваат, за трајно решение, потребна е и поддршка од граѓаните.

(А. П.)