Заканите за тероризам ги спречуваат прославите: Светските метрополи го откажуваат дочекот на Нова година

Поради зголемените безбедносни ризици и специфичните предупредувања за можни терористички напади, неколку светски метрополи одлучија да ги откажат или значително да ги ограничат планираните прослави за Нова Година. Претпазливоста е дополнително зголемена поради стравот од масовни толпи што би можеле да се претворат во хаос, а одлуките доаѓаат откако американските власти спречија обид за бомбашки напад во Лос Анџелес. Слични мерки се преземени во градови како Париз, Токио и Сиднеј, каде што некои настани веќе се откажани.

Во Лос Анџелес, ФБИ приведе четири лица – Одри Илен Керол (30), Закари Арон Пејџ (32), Данте Гафилд (24) и Тина Лаи (41) – кои беа фатени додека вежбаа планиран напад во пустината Мохаве. Осомничените беа запрени пред да можат да изградат функционална експлозивна направа. Иако градските власти сè уште официјално не ги откажаа прославите за Нова Година, безбедносните мерки се значително заострени, а присуството на полицијата и федералните агенции е зголемено.

Во Париз, традиционалниот концерт на Шанзелизе беше откажан од безбедносни причини, бидејќи властите проценија дека масовното собирање носи превисок ризик од немири и инциденти. Огнометот сепак ќе се одржи, но со зголемено полициско присуство и строга контрола на движењето.

Слична одлука беше донесена и во Токио, каде што беше откажано традиционалното новогодишно одбројување на прометната станица Шибуја. Причината е стравот од можни напади, но и стравот од смртоносни толпи, како и загриженоста за неконтролирана консумација на алкохол на јавни места.

Во Сиднеј, властите ја прекинаа програмата за огномет и настаните на плажата Бонди, каде што се очекуваа околу 15.000 посетители. Одлуката следеше по неодамнешното пукање во тој дел од градот, а организаторите изјавија дека е важно да се покаже солидарност со еврејската заедница. Премиерот на Нов Јужен Велс, Крис Минс, изјави дека повеќе вооружени полицајци ќе бидат распоредени на улиците на новогодишната ноќ и во наредните денови, додека безбедносните планови дополнително се разгледуваат, пренесува Блумберг.

Минс нагласи дека властите разгледуваат низа дополнителни мерки, вклучително и можноста за распоредување на војската, нагласувајќи дека ниедна опција не е исклучена.

Сите овие одлуки доаѓаат во услови на зголемени глобални тензии и сериозни разузнавачки предупредувања за можни напади за време на прославите на Нова Година. Додека градови како Њујорк и Лондон планираат рекордно присуство на полиција и дополнителни безбедносни бариери, други се одлучуваат превентивно да ги откажат настаните за да го намалат ризикот. Експертите за безбедност предупредуваат дека големите собири се особено ранливи, но и покрај ова, милиони луѓе низ целиот свет сè уште планираат да ја дочекаат 2026 година, надевајќи се дека зголемените мерки ќе обезбедат мирна и безбедна ноќ.